Óńirlerde bolǵan jarylystarǵa baılanysty Astana qalasynyń jol polıtsııasy kúsheıtilgen jumys rejimine kóshirildi
ASTANA. 14 qarasha. QazAqparat /Gúlmıra Alıakparova/ - Atyraý men Taraz qalalarynda bolǵan lańkestik oqıǵalarǵa baılanysty Astana qalasynyń jol polıtsııasy kúsheıtilgen jumys rejimine kóshirildi. Bul týraly búgin ótken baspasóz máslıhatynda elordalyq Jol polıtsııasy basqarmasy uıymdastyrý-taldaý jáne aldyn alý jumystary bóliminiń bastyǵy Marat Tuıaqbaev málim etti.
«Qazirgi ýaqytta jol polıtsııasynyń jeke quramy kúsheıtilgen jumys rejimine kóshirildi. Barlyq «Rýbej» baqylaý beketteri kúsheıtildi. ıAǵnı, jeke jáne qoǵamdyq qaýipsizdiktiń barlyq sharalary qolǵa alyndy», - dedi ol.
M.Tuıaqbaev atap kórsetkendeı, atý jáne jarý quraldaryn anyqtaý maqsatynda qalaǵa kireberis joldardaǵy barlyq 6 baqylaý beketinde kólikter jiti tekserilýde. Bul maqsatqa jol polıtsııasy qyzmetkerlerine kómekke jedel áreket etý jasaǵy, kınologtar men kóshi-qon polıtsııasy qosymsha jumyldyryldy.
Qala ishindegi kólik quraldaryn tekserý udaıy júrgizilgenimen, budan bylaı eger avtokóliktiń ıesi ne jolaýshylary polıtsııa qyzmetkerinde kúdik týdyratyn bolsa, olar qaýipsizdik maqsatynda jiti tekserýge alynatyn bolady. «Barlyq avtokólikter tekserýge jatady, sonyń ishinde «joǵarydan» habarlanǵan mashınalarǵa erekshe nazar aýdarylatyn bolady», - dedi ÝDP ókili.
M.Tuıaqbaevtyń aıtýynsha, kúsheıtilgen tártip QR Іshki ister mınıstrliginen arnaıy buıryq túskenshe jalǵasatyn bolady.
