Óńirlerde básekelestik kórsetkishin ázirlep, ony damý baǵdarlamalaryna engizý qajet - S. Áıimbetov
ASTANA. 15 qazan. QazAqparat - Óńirlerde básekelestik kórsetkishin ázirlep, ony damý baǵdarlamalaryna engizý qajet.
Búgin Parlament Májilisinde Básekelestikti qorǵaý agenttigi qyzmetiniń negizgi baǵyttary taqyrybynda ótken Úkimet saǵatynda Ekonomıkalyq damý jáne óńirlik damý komıtetiniń tóraǵasy, depýtat Seıitsultan Áıimbetov osylaı málim etti.
«Bizdiń oıymyzsha mańyzdy máselelerdiń biri jergilikti básekelestikti damytý. 2012 jylǵy joldaýda Prezıdent «Qazaqstannyń ındýstrııalyq-ınnovatsııalyq damýy - elimizdiń negizgi baǵyttarynyń biri bolyp tabylady» dep atap kórsetti. Buny oıdaǵydaı iske asyrý úshin qolaıly básekelestik ortany qalyptastyrý asa qajet. Ásirese, bul óńirlerde básekelestikti damytý jolyndaǵy ózekti másele bolyp tabylady. Sondyqtan da, osy baǵytta jergilikti atqarýshy organdar óńirler erekshelikterin eskere otyryp, olardyń damý baǵdarlamalarynda naqty pármendi sharalar qarastyrýy tıis»,- deıdi komıtet tóraǵasy. Onyń aıtýynsha, ákimshilikter bıznes júrgizýge kedergi keltiretin normatıvtik quqyqtyq aktilerdi azaıtýdy, kásipkerlikti damytý úshin járdem kórsetýdi jalǵastyrýlary qajet.
«Osyǵan baılanysty óńirlerdegi básekelestik kórsetkishin ázirlep, ony damý baǵdarlamalaryna engizetin ýaqyt jetti dep sanaımyz. Bizdiń pikirimizshe, mańyzdy salalarda ındekster qaralyp, olar eldi mekenderdi damytý baǵdarlamalarynda básekelestikti damytý problemalaryn aıqyndaýǵa, ulttyq ındıkatorlardy kórsete, naqty eskere otyryp, tıisti mindetter men is-sharalardy kórsetýge, óńirlerdiń kúshti jáne álsiz tustaryn, básekege qabilettiligin anyqtaýǵa mursat bermek», - dedi S. Áıimbetov.
