Óńirlerde azyq-túlik taýarlarynyń baǵalary qalaı ózgerdi

ASTANA. QazAqparat - Elimizdiń birqatar qalasynda áleýmettik mańyzy bar azyq-túlik taýarlary baǵalarynyń shamaly tómendeýi baıqaldy. Bul týraly búgin Úkimettiń selektorlyq rejimdegi otyrysynda áleýmettik mańyzy bar azyq-túlik taýarlaryna baǵalardy turaqtandyrý jóninde baıandaǵan QR Aýyl sharýashylyǵy birinshi vıtse-mınıstri Arman Evnıev aıtty, dep habarlaıdy QazAqparat tilshis

Jalpy alǵanda jyldyń basynan beri respýblıka boıynsha barlyq áleýmettik mańyzy bar azyq-túlik taýarlary baǵalarynyń shamaly ósýi baıqalady.

«Eń joǵary baǵalardyń ósýi qant boıynsha - 17,6, kúrish -11,3, qyryqqabat - 8,6 paıyz boldy. Sonymen birge, keıbir taýarlar túrleri boıynsha baǵalardyń tómendeýi baıqalady. Olar qaraqumyq jarmasy - 27,2, kartop - 22,3 jáne pııaz -16 paıyzǵa arzandady. Óńirler keskininde jalpy barlyq áleýmettik mańyzy bar azyq-túlik taýarlary baǵalarynyń eń joǵary ósýi Túrkistanda - 4,7, Shymkentte - 4,5, Jezqazǵanda - 3,7 paıyz baıqaldy. Almaty, Aqtaý, Qaraǵandy, Qyzylorda, Oral, Semeı qalalarynda 1 paıyzǵa deıin baǵalardyń tómendeýi tirkeldi»», - dedi ol.

Onyń aıtýynsha, kókónis ónimderi baǵalarynyń aýytqýynyń negizgi sebebi maýsymǵa baılanysty. Buǵan qosa áleýmettik mańyzy bar azyq-túlik taýarlaryna baǵalardyń shamaly ósýi ulttyq valıýtanyń qunsyzdanýyna baılanysty oryn alǵan. Munan bólek, azyq-túlik taýarlaryna baǵalardyń ósýine ónimniń ózindik qunyna tikeleı áser etetin taýarlar men qyzmetterdiń baǵalarynyń ósýi áser etken.

«Mysaly, 2018 jyldyń birinshi jartyjyldyǵynda dızeldiń baǵasy - 17,2, elektr qýaty - 3,5, jylý - 3,5, gazben qamtamasyz etý - 4,8, qoqys shyǵarý - 3, sýyq sý - 4,4, káriz jelisi 3,2 paıyzǵa ósti», - dedi Arman Evnıev.