Óńirlerde ákimderdiń halyqpen kezdesýi kezinde 29 myńnan astam usynys pen másele kóterildi
«Memleket basshysy bıyl 3 naýryzda barlyq deńgeıdegi ákimderdiń halyqpen turaqty kezdesýleriniń jańa formatyn bekitti. Ákimdikter máslıhattarmen kelise otyryp, 2022 jylǵa arnalǵan kezdesýlerdiń ıkemdi kúntizbelerin bekitti. Onda barlyq deńgeıdegi ákimder birinshi jartyjyldyqtyń qorytyndysy boıynsha 594 myń adamnyń qatysýymen halyqpen 8,5 myńǵa jýyq kezdesý ótkizdi. Turǵyndar turǵyn úı-kommýnaldyq ınfraqurylym, abattandyrý, jer, ekologııa, joldardy rekonstrýktsııalaý, áleýmettik ınfraqurylym nysandaryn salý men turǵyn úı máseleleri jáne basqa da taqyryptar boıynsha 29,2 myńnan astam usynys pen másele kóterdi», - dedi Á. Qýantyrov.
Onyń aıtýynsha, jergilikti atqarýshy organdarmen kezdesýlerdiń qorytyndysy boıynsha 12,6 myń másele sheshildi, ákimdikterdiń baqylaýyndaǵy qalǵan suraqtardy sheshý úshin 515 mlrd teńge qajet. Óńirler bıýdjetterdi túzetý aıasynda 149,2 mlrd teńge nemese qajet qarajattyń 29 paıyzy qarastyrǵan.
«Óńirler bólinisinde 6 óńirde jergilikti bıýdjet qarajatymen qamtamasyz etý deńgeıi orta respýblıkalyq deńgeıden az. Eń tómen kórsetkish Pavlodar, Soltústik Qazaqstan jáne Almaty oblystarynda. Jergilikti atqarýshy organdardyń usynystary negizinde ortalyq memlekettik organdar, ulttyq holdıngter men kompanııalar deńgeıinde sheshýdi qajet etetin máselelerdiń tizbesi qalyptastyryldy. Bul tizim 140 máseleden turady», - dedi vedomstvo basshysy.
Suraqtardyń basym bóligi respýblıkalyq bıýdjetten qarjy bólý qajettiligine qatysty bolyp tur.
Osy oraıda óńirlerde 18 másele boıynsha qajetti qujattama joq. Al birneshe kezeńde qarjylandyrýdy qajet etetin 22 iri joba men júıeli máselelerge respýblıkalyq bıýdjetten bıyl 102,9 mlrd teńge qarastyrylǵan.
«Ákimdikterdiń óz quzyretine kiretin máselelerdi ortalyq dengeıde sheshiletin problemalar tizbesine engizý faktileri bar ekenin atap ótemiz. Osyǵan oraıda 140 máseleniń ishinen memlekettik organdar 28-in qoldamady», - dedi mınıstr.
Budan buryn habarlanǵandaı, Prezıdenttiń «Ortalyq atqarýshy organdar basshylarynyń halyqpen kezdesýler ótkizý týraly» Jarlyǵy qabyldandy.
Budan buryn habarlanǵandaı, Úkimet basshysy keıbir óńirlerde basshylar halyqpen kezdesýdiń jańa formatyna beıimdelmeı, eski súrleýden shyǵa almaı otyrǵanyn synady.
Úkimet otyrysynda bıyldan bastap ortalyq jáne jergilikti atqarýshy organ basshylarynyń óńirlerge baryp, halyqpen júzbe-júz kezdesý ótkizýdiń jańa tártibi júzege asyrylyp jatqany aıtyldy.
