Óńirler ózderine bólinetin qarajatty ıgerýge daıyn bolýy tıis - Álıhan Smaıylov

NUR-SULTAN. QazAqparat - Óńirler «Eńbekpen qamtý» jol kartasy men Turǵyn úı qurylysy baǵdarlamasy aıasynda bólinetin qarajatty qabyldaýǵa ári ıgerýge daıyn bolýy tıis. Bul týraly Úkimet otyrysynda QR Premer-Mınıstriniń birinshi orynbasary - Qarjy mınıstri Álıhan Smaıylov aıtty, dep habarlaıdy QazAqparat tilshisi.

«Bıýdjet kiristeri boıynsha shyǵyndardy óteýge jáne joǵaryda atalǵan sharalardy iske asyrý úshin respýblıkalyq bıýdjet shyǵystary 532 mlrd teńgege ońtaılandyryldy. Bıýdjet tapshylyǵy 841 mlrd teńgege ulǵaıtyldy. Nátıjesinde respýblıkalyq bıýdjet parametrleri bylaısha qalyptasty: túsimder – 11,8 trln teńge; shyǵystar – 14,3 trln teńge; tapshylyq – 2,4 trln teńge nemese jalpy ishki ónimge 3,5 paıyz», - dedi birinshi vıtse-premer.

Onyń atap ótýinshe, respýblıkalyq bıýdjetti naqtylaý boıynsha tıisti Jarlyqtyń jobasy Memleket basshysynyń qaraýyna jiberiletin bolady.

«Osy sheshim qabyldanǵan kúninen bastap barlyq bıýdjet ákimshileri qosymsha bólingen qarajatty ýaqytyly jáne tıimdi ıgerý úshin tıisti memlekettik satyp alý jáne basqa rásimderdi der kezinde iske asyrýy qajet. Sonyń ishinde búgin-erteń barlyq óńirlerde máslıhattardyń otyrystaryn ótkizý kerek jáne «Eńbekpen qamtý» jol kartasy men Turǵyn úı qurylysy baǵdarlamasy aıasynda bólinetin qarajatty qabyldaýǵa ári ıgerýge daıyn bolýy tıis», - dedi Álıhan Smaıylov.