Óńirler arasyndaǵy bilim sapasynyń aıyrmashylyǵy 2 jyldy quraıdy - mınıstr
NUR-SULTAN. QazAqparat - Óńirler arasyndaǵy bilim sapasynyń aıyrmashylyǵy 2 jyldy quraıdy. Bul týraly QR Bilim jáne ǵylym mınıstrliginiń keńeıtilgen alqa otyrysynda vedomstvo basshysy Ashat Aımaǵambetov aıtty, dep habarlaıdy QazAqparat tilshisi.
«PISA-2018 qorytyndysy bilim sapasy boıynsha óńirler arasyndaǵy aıyrmashylyqtyń joǵary ekendigin taǵy bir márte kórsetti. Bul zertteýge sáıkes, eń myqty jáne eń álsiz óńirler arasyndaǵy alshaqtyq oqý boıynsha 84 ball, matematıkadan 73, jaratylystanýdan 70 baldy quraıdy. Bul endi baıaǵy ádistememen sanaǵanda kem degende 2 jyl. ıAǵnı, Qazaqstandaǵy eń aldyńǵy qatarda turǵan óńirmen eń sońǵy bolyp turǵan óńirdiń bilim sapasy arasyndaǵy aıyrmashylyq búginde 2 jyl degen sóz»,- dedi ol.
Mınıstrdiń aıtýynsha, bilim sapasyndaǵy alshaqtyq qala jáne aýyl mektepteriniń arasynda da baıqalady. Oqý boıynsha aıyrmashylyq 38, matematıkadan 22, jaratylystanýdan 32 baldy quraıdy.
«Jalpy ońtústik óńirler, ásirese batys óńirler elimizdegi kórsetkishten de tómen nátıje alyp otyr. Kóshbasshylar qatarynda Nur-Sultan, Almaty qalalary, Qaraǵandy, Qostanaı, Soltústik Qazaqstan, Shyǵys Qazaqstan oblystary tur. Oqý jetistikterin syrtqy baǵalaý boıynsha Jambyl oblysynan basqa óńirler ózderiniń josparly kórsetkishterine qol jetkizgen joq», - dedi Bilim mınıstri.
Onyń atap ótýinshe, Prezıdenttiń tapsyrmasy boıynsha bilim berý sapasyndaǵy alshaqtyqty qysqartý úshin keshendi sharalar qabyldanatyn bolady.
«Shaǵyn jınaqty mektepter bilikti kadrlarlarmen qamtamasyz etiledi. Eńbekaqy tóleý júıesi ózgertiletin bolady. Aýyl mektepterin oqý materıaldarymen, kompıýterlik jáne taǵy da basqa materıaldyq-tehnıkalyq jabdyqtarmen tolyq qamtý úshin bizde tıisti qarjy jańa memlekettik baǵdarlamada qarastyryldy. Osylaısha biz osy máselelerdi sheshetin bolamyz», - dedi Ashat Aımaǵambetov.
