Óńirler arasyndaǵy básekelestikti kúsheıtý qajet – Kazakh Tourism

NUR-SULTAN. QazAqparat – «Kazakh Tourism» UK» AQ basqarma tóraǵasynyń orynbasary Qaırat Sádýaqasov Qazaqstandaǵy ishki týrızmdi damytý joldary týraly aıtyp berdi, dep habarlaıdy QazAqparat tilshisi.

Onyń sózinshe, ishki týrızmdi damytýdyń eki joly bar.

«Birinshi joly – yntalandyrý sharalary. Máselen, EKSPO-2017 kezinde týrıster kóp boldy, sáıkesinshe ynta boldy. Qazir batys elderi kóbirek bilý úshin aqparattyq týrlar ótkizip jatyrmyz. Jaqyn arada ońtústikten shyǵys óńirlerge týrıstik operatorlardy aparamyz», - dedi Qaırat Sádýaqasov Nur-Sultanda ótken Halyqaralyq blogerler forýmynda.

Іshki týrızmdi damytýdyń ekinshi joly retinde spıker óńirler arasyndaǵy básekelestikti atady.

«Keı óńirler birden sheteldik týrısterge aýyz salǵysy keledi, bar nazardy solarǵa aýdaryp otyr. Biraq, olar eń basty aýdıtorııanyń ishki týrıster ekenin umytpaýy tıis. Qazir ákimdikterdi osy jumysqa shaqyryp jatyrmyz. Almaty Nur-Sultanmen, Nur-Sultan Aqtaýmen básekege túsýi kerek. Olar barynsha belsendi bolyp, jarnama jasaýlary qajet», - dedi Kazakh Tourism ókili.

Aıta keteıik, elordada «Qazaqstandy tany» halyqaralyq blogerler forýmy bastaldy. Oǵan Ulybrıtanııa, AQSh, Aýstralııa, Italııa, Reseı, Úndistan, Taıland, Kanada syndy álemniń 18 elinen blogerler jınaldy.

Shara barysynda qatysýshylarǵa blogıngti damytý týraly «Saıahattaǵy sýret», «YouTube profılin damytý», «Startap promoýter», «Bıznes-blogıng», «Áleýmettik shyndyq», «Qazaq Instagram» taqyrybynda sheberlik synyptary uıymdastyrylady.