Óńirdegi medıtsınalyq nysandarda EKSPO ınnovatsııalary engiziledi - Saparbaev
ASTANA. QazAqparat - Ortalyq kommýnıkatsııalar qyzmetindegi baspasóz máslıhatynda Aqtóbe oblysynyń ákimi Berdibek Saparbaev «Aktobe Medical Center» medıtsınalyq klasteriniń damýy týraly áńgimeledi., dep habarlaıdy QazAqparat.
Búgingi tańda atalmysh klaster negizinde 400-den astam joǵary tehnologııalyq otalar jasalsa, onyń ishinde baýyr men búırekti aýystyrý boıynsha otalar da bar. Jańa tehnologııalardy ázirleý men engizýdegi áriptester retinde Ońtústik Koreıa, Polsha, Túrkııa jáne basqa da elderindegi eń myqty dárigerler men medıtsınalyq uıymdar tańdaldy.
Medıtsınalyq klasterdi damytýda memlekettik-jekeshelik áriptestik tetikteri belsendi qoldanylýda. Memlekettik-jekeshelik áriptestik (MJÁ) aıasynda túrik ınvestorlary 2,4 mlrd teńge turatyn jedel járdem stantsııasyn saldy. Batys Qazaqstandaǵy biregeı qurylys nysany - Oftalmologııalyq aýrýhananyń (3,2 mlrd teńge), 300 kelýshige arnalǵan qalalyq balalar stomatologııalyq emhanasynyń (612 mln tg) qurylysy aıaqtalýǵa jaqyn. Sonymen qatar pozıtrondy-emıssıondy tomografııalyq ortalyqtyń (3,4 mlrd teńge), eki qalalyq emhana (árqaısysy 2,2 mlrd teńge) men 20 densaýlyq saqtaý mekemesiniń qurylys jumystary júrgizilýde. Aımaqta densaýlyq saqtaý salasynda MJÁ boıynsha jalpy quny shamamen 14 mlrd. teńgeni quraıtyn 26 nysan salynýda.
«Barlyq nysandarda EKSPO-2017-de usynylǵan nemis, ońtústik koreıalyq, avstrııalyq jáne túrik óndirýshileriniń ınnovatsııalyq ázirlemeleri men jabdyqtary qoldanylatyn bolady», - dep naqtylady aımaq basshysy.
Sonymen qatar, óńirde ómir súrý uzaqtyǵynyń artqany, jalpy jáne náresteler óliminiń azaıýy baıqalady. Jyl basynan beri bir de bir ana ólimi oqıǵasy tirkelmegen.
