Óńirdegi kadr tapshylyǵyn 5-6 jylda joıamyz - Nurlan Noǵaev

ASTANA. QazAqparat - Atyraý oblysynyń ákimi Nurlan Noǵaev óńirdegi kadr jetispeýshiligi máselesi qalaı sheshilip jatqanyn aıtyp berdi, dep habarlaıdy QazAqparat tilshisi.

«Kadr tapshylyǵy týraly aıtar bolsaq, qazirgi tańda oblysqa 150 maman jetispeıdi. Jetispeı jatqan kadrlardyń ishinde orys tilindegi bastaýysh synyp muǵalimderi jáne matematıka, bıologııa pánderin orys tilinde beretin ustazdardy atap ótýge bolady. Kadr máselesin sheshý maqsatynda 2017 jyly oblystyq bıýdjetten 222 stýdentke grant bólgen bolatynbyz. Sonyń 176-sy - muǵalim mamandyǵy boıynsha bólingen grant bolsa, 35-i - medıtsına, 8-i - aýyl sharýashylyǵy salasyndaǵy oqý oryndaryna baǵyttalǵan», - dedi Nurlan Noǵaev.

Óńir basshysynyń aıtýynsha, bıyl Atyraý oblysy bakalavrıatqa 231, magıstratýraǵa 16 grant bólgen. 

«Magıstratýraǵa qarastyrylǵan granttar ekonomıka, menedjment jáne ekologııa mamandyqtary boıynsha bólindi. 231 granttyń ishinde 149-y pedagogıka mamandyqtaryna bólingen. Eger osy qarqynmen júre beretin bolsaq, 5-6 jyldyń ishinde biz maman tapshylyǵyn joıamyz», - dedi Nurlan Noǵaev.

Óńir basshysy óz sózinde densaýlyq saqtaý salasyndaǵy kadr tapshylyǵy týraly da aıtyp ótti. Nurlan Noǵaevtyń aıtýynsha, densaýlyq saqtaý salasynda óńirde 92 mamannyń jetispeıtini anyqtalǵan.

«Densaýlyq saqtaý salasyna byltyr 35, bıyl 53 grant bólinip, sonyń arqasynda Astana jáne Qaraǵandy medıtsına ýnıversıtetterine stýdentter joldandy. Ol mamandar oqý bitirgennen keıin mindetti túrde aýylǵa kelip, ózderiniń týǵan jerinde jumys isteýi kerek», - dedi ol.