Óńirdegi barlyq mektepte beınebaqylaý men dabyl júıesi ornatylady – Danıal Ahmetov
ÓSKEMEN. QazAqparat - Shyǵys Qazaqstan oblysy ákimdiginiń otyrysynda aımaqty damytýǵa qatysty birqatar mańyzdy máseleler qaraldy, dep habarlaıdy QazAqparat óńir basshysynyń baspasóz qyzmetine silteme jasap.
Naqty aıtqanda, otyrysta agroónerkásip kesheni salasyndaǵy jańa jobalar talqylandy. ShQO-da aýyl sharýashylyǵy ónimderiniń óndirisi damyp keledi. Máselen, maıly daqyldardy egetin alqaptar ulǵaıýda. Sebebi, fermerler Semeıde jáne Glýbokoe aýdanynyń Predgornoe aýylynda eki iri maı ekstraktsııalyq zaýyty bar ekenin jáne ónimderin solarǵa ótkize alatyndaryn jaqsy biledi. Sondaı-aq, salada jaıylymdyq jerlerge qatysty problema bar. Zańnamaǵa engizilgen keıingi ózgerister paıdalanylmaı jatqan jaıylymdyq jerlerdi qaıtaryp alyp, shynaıy muqtaj sharýalarǵa usynýǵa múmkindik bermek. Aıta ketý kerek, kóptegen kásipkerler ıgermeıtin jerlerin óz erikterimen qaıtaryp jatyr.
Ekinshi mańyzdy másele – mektepke deıingi bilim berý mekemelerine qoljetimdilikti qamtamasyz etý. ShQO – 3 jastan 6 jasqa deıingi balalardyń balabaqshaǵa barý kezegi tolyǵymen joıylǵan elimizdegi jalǵyz aımaq.
Biraq, Óskemen men Semeıde kishkentaı búldirshinderge arnalǵan bóbekjaıǵa áli de kezek kútip júrgender bar.
«Bizge kishkentaı búldirshinderdi qabyldaıtyn bóbekjaılardyń máselesimen jaqsylap aınalysý kerek. Aldaǵy 10 kúnde barlyq qalalar men aýdandardyń ákimderi jospar daıyndap, qajettilikti zertteıdi. Kelesi jyly memlekettik jekemenshik áriptestik aıasynda jańa nysandardyń qurylysyn bastap ketemiz», - dedi óńir basshysy.
Mektepterdiń jańa oqý jylyna daıyndyǵy týraly aıtqan Danıal Ahmetov, «19 tamyzǵa deıin oblystyń barlyq jalpy bilim beretin 647 mektebinde jóndeý jumystary aıaqtalatynyn» málim etti.
Qazir kabınetter men ashanalardy jańǵyrtý júrip jatyr. Bilim berý mekemeleriniń bárine beınebaqylaý men dabyl júıeleri ornatylady.
Birinshi qyrkúıekke deıin barlyq mektep qajetti otyn qorymen qamtamasyz etiledi.
Oblys ákimi mektepten tys balalardy damytý, shyǵarmashylyqqa baýlý jumystaryn uıymdastyrý áli de jetkiliksiz dep esepteıdi. Óıtkeni, ShQO-da bar-joǵy 114 úıirme men sektsııa bar.
