Óńirde sý tasqyny qaýpi áli de bar - Ermek Marjyqpaev

KÓKShETAÝ. QazAqparat – Aqmola oblysynda sý tasqyny qaýpi áli de seıilgen joq. Osyǵan baılanysty QR Parlamenti Senatynyń depýtaty Nurlan Bekenov pen oblys ákimi Ermek Marjyqpaev qaýipti aýmaqtardy áýeden baqylap shyqty, dep habarlaıdy QazAqparat tilshisi.

Ushý baǵyty Zerendi, Sandyqtaý, Atbasar, Astrahan, Bulandy jáne Býrabaı aýdandaryn qamtydy. Osylaısha, neǵurlym osal ýchaskelerdegi sý tasqyny qaýpi baqylandy.

«Óńirde sý tasqynynyń qaýpi áli de bar. Áýeden baqylaý kezinde baıqanymyzdaı, orman ishindegi jáne sý qoımalaryndaǵy qar men muz áli erı qoıǵan joq. Bul aǵyn sý Shaǵalaly sý qoımasyna quıylyp, Jabaı ózeniniń ańǵaryn lezde toltyrýy múmkin. Sol sebepti, jergilikti atqarýshy organdar men Tótenshe jaǵdaılar departamentiniń kúshteri birlesip, óńirdegi barlyq sý qoımalaryndaǵy sýdyń deńgeıin táýlik boıy baqylaýy tıis», - dedi Ermek Marjyqpaev.

Aımaq basshysy Atbasardaǵy №1 orta mekteptiń qaýipti aımaqta ornalasqanyna toqtaldy. Mektepti aǵyn sýdan tolyq qorǵaý úshin irgetasy betonnan quıylǵan tas qorshaý bar. Osy qorshaýdyń bútindigi men temirjol ótkeliniń astyndaǵy qubyrlardyń aǵyn sýdy ótkizý múmkindigi baqylaýda ustalýy kerek ekenin aıtty.

Aıta ketsek, oblysta sý tasqynynyń aldyn alý maqsatynda 14 aýdandaǵy 53 eldi mekende qar tazalaý, sý sorý, muz jarý, sý arnalary men ózen ańǵarlaryn tazalaý sııaqty is-sharalar qolǵa alyndy.

Sondaı-aq, Tótenshe jaǵdaılar mınıstri Arshaly jáne Tselınograd aýdandaryn baqylap shyqqan bolatyn.