Óńirde negizgi ózekti máseleniń biri jol bolyp otyr - BQO ákimi
ORAL. QazAqparat - Batys Qazaqstan oblysynda negizgi ózekti máseleniń biri jol bolyp otyr. Bul týraly búgin Oqýshylar jáne jastar saraıynda halyq aldyndaǵy eseptik kezdesýinde oblys ákimi Altaı Kólginov málim etti, dep habarlaıdy «QazAqparat» tilshisi.
Memleket basshysynyń tapsyrmalaryna sáıkes atqarylǵan jumystar men alda turǵan basty maqsat-mindetterge toqtalǵan oblys basshysynyń aıtýynsha, Batys Qazaqstan jol jóninen elimiz boıynsha eń artta qalǵan óńir bolyp sanalady. Bul baǵytta sońǵy jyldary jol qurylysyna aıryqsha kóńil bólinip keledi. 2014 jyly oblysta 160 km jol retke keltirilse, 2016 jyly ol 290 shaqyrymǵa jetti. Al ótken jyly 500 km jol jóndeý qolǵa alynyp, sonyń 420 shaqyrymynda aıaqtaldy. Mundaı jumystar oblystyń toǵyz aýdanynda júrgizildi. Oblys ortalyǵynan shalǵaı ornalasqandyqtan ǵana, Bókeı ordasy men Jánibek aýdandary ázirge budan tys qaldy. Bıyl bul aýdandarda da joldar jóndeletin bolady.
«Nurly jol» baǵdarlamasy aıasynda Oral-Tasqala-RF shekarasy kúre jolynyń 70 shaqyrymy paıdalanýǵa berilse, bıyl bul joba tolyqtaı aıaqtalady. Sondaı-aq oblystyq mańyzy bar 128,5 shaqyrym jol retke keltirildi. Oblys ortalyǵy Oral qalasynda ótken jyly 67 kósheniń joly jóndelip, sonyń 61-inde jumys márege jetti. Eger 2016 jyly Oralda jol qurylysyna 2,4 mlrd teńge bólinse, ótken jyly 8,1 mlrd teńgege jetti. Depo kópiri qurylysyna bólingen qarjyny qosqanda, 10 mlrd teńgeden asty.
«Oblys joldaryn jaqsartý maqsatynda budan bylaı da jumys jasaıtyn bolamyz», dedi oblys ákimi.
