Óńiraralyq forýmdar qazaq-ózbek qatynastarynyń nyǵaıýyna yqpal etedi - sarapshy
NUR-SULTAN. QazAqparat - Qazaqstan Ózbekstan arasyndaǵy óńiraralyq forýmdar eki el qarym-qatynasynyń nyǵaıýyna yqpal etetin qadam bolmaq. Memleket basshysy Qasym-Jomart Toqaevtyń Ózbekstanǵa memlekettik saparyna oraı pikir bildirgen «Ekonomıkalyq zertteýler ınstıtýty» AQ Taldaý jáne álemdik ekonomıka ortalyǵynyń jetekshi sarapshysy Muhtar Kúljan osylaı aıtty, dep habarlaıdy QazAqparat tilshisi.
«Shavkat Mırzıeev Ózbekstannyń Prezıdenti laýazymyna saılanǵannan keıin kórshi eldiń Qazaqstanmen aradaǵy qarym-qatynasynda úrdis paıda boldy. Jalpy, Ózbekstan TMD elderi ıntegratsııalyq úderisterge ashyla bastady. Bul rette Qazaqstan Respýblıkasymen yntymaqtastyǵynyń orny aıshyqtala túskendigin atap ótken oryndy», - dedi ol.
Onyń aıtýynsha, saparmen kelgen shetel memleketin qarsy alý dıplomatııalyq protokolyndaǵy belgiler elderdiń qarym-qatynasynyń deńgeıin kórsetedi.
«Ózbekstanǵa memlekettik saparmen barǵan Qazaqstan Prezıdenti Qasym-Jomart Toqaevty erekshe jyly qabyldap, qonaqjaılyqpen qarsy aldy. Memleket basshylarynyń qatysýymen ótken Ózbekstandaǵy Qazaqstan jylynyń ashylý saltanatty sharasy da óte joǵary deńgeıde uıymdastyryldy. Mundaı bıik mártebeni tek etene jaqyn memleketter, odaqtastar ǵana usynady», - dedi sarapshy.
Muhtar Kúljannyń atap ótýinshe, Qazaqstan-Ózbekstan óńiraralyq forýmdary eki eldiń ekonomıkalyq qatynastarynyń odan ary nyǵaıa túsýine yqpal etetin mańyzdy qadamdardyń biri bolmaq.
«Ekonomıkalyq ta baǵdar bekitildi. Ol - ekijaqty taýar aınalymyn 5 mıllıard dollarǵa jetkizý. Yntymaqtastyǵymyzdyń negizgi salalary retinde kólik qatynastarynyń qarqynyn arttyrý, logıstıkalyq ınfraqurylymdaryn damytý, aýyl sharýashylyǵy máseleleri aıtyldy.
Memleket basshysynyń sapary aıasynda qol qoıylǵan Qazaqstan Respýblıkasynyń Ulttyq ekonomıka mınıstrligi men Ózbekstan Respýblıkasynyń Investıtsııalar jáne syrtqy saýda mınıstrligi arasyndaǵy «Ortalyq Azııa» halyqaralyq saýda-ekonomıkalyq yntymaqtastyq ortalyǵyn qurý máseleleri jónindegi ózara túsinistik týraly memorandým da ekonomıkanyń barlyq salasyndaǵy ózara tıimdi ári jemisti yqpaldastyqty keńeıte túsýge qyzmet eterine senimim mol», - dedi sarapshy.
