Óńir turǵyndary kótergen máselelerdiń eshqaısysy qaraýsyz qalmaýy tıis – Álıhan Smaıylov
NUR-SULTAN. QazAqparat – Halyqpen kezdesýler kezinde kóterilgen usynystardyń eshqaısysy qaraýsyz qalmaýy tıis. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.
«Memleket basshysy «Halyq únine qulaq asatyn memleket» prıntsıpiniń mańyzdylyǵyn atap kórsetti. Biz halyqtyń muń-muqtajyna qulaq asyp, olardyń syn-pikirlerin de tyńdaı bilýimiz kerek. Adamdardy kúndelikti bolyp jatqan qarapaıym máseleler alańdatady. Tek osyndaı kezdesýlerdiń qorytyndysy boıynsha ǵana halyqtyń tarapynan 30 myńǵa jýyq másele men usynys kóterildi. Bulardyń birde-bireýi qaraýsyz qalmaýy tıis. Adamdar ózderi kótergen máselelerdiń naqty sheshimin taýyp jatqanyn kórýi kerek», - dedi Á. Smaıylov.
Osy oraıda Úkimet basshysy bıyldyń sońyna deıin ortalyq jáne jergilikti organdar halyqpen josparlanǵan barlyq kezdesýlerdi bekitilgen format pen kestege sáıkes ótkizýdi jalǵastyrýy qajet ekenin aıtty.
«Qazirgi qolda bar zamanaýı kommýnıkatsııalar men resýrstardyń bárin paıdalanyp, ár kezdesýdi keńinen jarııalap otyrý kerek. Qandaı jumys atqaryldy, basqa máseleler qalaı sheshimin tabady, sonyń bárin naqty kórsetý kerek», - dedi Premer-Mınıstr.
Budan buryn habarlanǵandaı, Úkimet basshysy keıbir óńirlerde basshylar halyqpen kezdesýdiń jańa formatyna beıimdelmeı, eski súrleýden shyǵa almaı otyrǵanyn synady.
Úkimet otyrysynda bıyldan bastap ortalyq jáne jergilikti atqarýshy organ basshylarynyń óńirlerge baryp, halyqpen júzbe-júz kezdesý ótkizýdiń jańa tártibi júzege asyrylyp jatqany aıtyldy.
Foto: t.me/KZgovernment
