«Óńir» depýtattyq tobyndaǵy senatorlar aýyl ákimderin saılaýdaǵy túıitkilderdi talqylady
Onda senatorlar aýdandyq mańyzy bar qalalar, aýyldar, kentter, aýyldyq okrýgter ákimderiniń tikeleı saılaýyn ótkizý barysynda aıqyndalǵan problemalardy talqylady. Depýtattar sonymen qatar bılik deńgeıleri ókilderiniń derbestigi men jaýapkershiligin keńeıtýge qatysty máselelerdi de kóterdi.
«Óńir» depýtattyq tobynyń tóraǵasy Erik Sultanov otyrysty asha kelip, aýyl ákimderiniń tikeleı saılaýyn engizý jáne óńirlerdiń qarjylyq derbestigin keńeıtý azamattardy jergilikti ózin-ózi basqarý máselelerine tartýdaǵy mańyzdy qadam ekenin atap ótti.
«Bul jumys aýyldyq okrýgterdiń qarjylyq derbestigin arttyrýǵa yqpal etedi. Atap aıtqanda, salyqtar men alymdardyń 4 túrin osy deńgeıge aýystyrý esebinen bjúzege asady. Árıne, bul sharalardyń barlyǵy óńirlerdi nyǵaıtýdy kózdeıdi. Bul memlekettik saıasattyń negizgi basymdyqtarynyń biri», - dedi Sultanov.
Senator Dúısenǵazy Mýsın Aqmola oblysyna sapary barysynda depýtattar óńir turǵyndary aldynda 4 deńgeıdegi bıýdjetke qatysty problemalyq máselelerdi kótergenin atap ótti. Eń mańyzdysynyń biri –salyq bazasy tómen bolýy jáne tıisinshe, qarjy túsimderi deńgeıiniń tómendigi bolyp otyr. Senatordyń aıtýynsha, Bıýdjet kodeksine sáıkes, 4 deńgeıdiń shyǵyndary 19 baǵyt boıynsha iske asýy tıis, alaıda búgingi kúni olar tolyq kólemde qamtamasyz etilmegen.
«Derbes bıýdjetke tólem kózinen salyq salynatyn tabystardan jeke tabys salyǵy men áleýmettik salyqty tóleý týraly máseleni keıinge qaldyrmaı qaraı otyryp túpkilikti sheshý mańyzdy dep sanaımyn. Osyndaı aýqymdy sharalardy qabyldaý arqyly ǵana derbes bıýdjettegi ózin-ózi qamtamasyz etý úlesin 2025 jylǵa qaraı josparlanǵan 35%-ǵa deıin arttyrýǵa bolady», - dedi ol.
Otyrys barysynda salyq aýdarymdaryn ákimshilendirýdi odan ári jetildirýdiń mańyzy atap ótildi. Qarjy mınıstriniń orynbasary Danııar Janalınovtyń aqparaty boıynsha aǵymdaǵy jyly jergilikti ózin-ózi basqarý bıýdjetine tólemderdiń 4 túri boıynsha túsimder beriletin bolady. Olar boıynsha túsimderdiń boljanǵan ósimi shamamen 13,5 mlrd teńgeni quraıdy. Sonymen qatar, Ulttyq ekonomıka mınıstrligi zańnamaǵa ázirlenip jatqan ózgerister týraly habardar etti, oǵan sáıkes 2024 jylǵa qaraı aýyl bıýdjetterine qosymsha 3 salyq pen tólem túrin berý josparlanyp otyr.
«Óńir» depýtattyq toby otyrystyń qorytyndysy boıynsha usynymdar ázirledi, ol barlyq múddeli memlekettik organdarǵa jiberiletin bolady.
