«Ónimdilik - 2020» baǵdarlamasyna 171 kásiporyn qatysýǵa nıet bildirdi

ASTANA. 22 tamyz. QazAqparat /Qanat Mámetqazyuly/ - «Ónimdilik -2020» baǵdarlamasyna qatysýǵa 171 kásiporyn nıet bildirgen. Búgin Úkimette ótken selektorlyq keńeste QR Vıtse-premeri-Indýstrııa jáne jańa tehnologııalar mınıstri Áset Isekeshev osylaı málim etti.

Mınıstrdiń aıtýynsha, aǵymdaǵy jyldan bastap júzege asa bastaǵan baǵdarlama jańa óndiristerdi qurý men jańǵyrtýdy kózdeıdi. Óz damýy úshin áleýetke ıe bolǵysy keletinderge qoldaý sharalary da bul baǵdarlama sheńberinde kózdeledi. «Baǵdarlamada birqatar mańyzdy tetikter qarastyrylǵan. Atap aıtqanda jańǵyrtý josparyn ázirleýge járdemdesý, zamanaýı basqarýshylyq tehnologııalaryn engizý, zamanaýı qondyrǵyny jetkizý boıynsha uzaq merzimdi lızıng qarastyrý, qajetti joǵary bilikti kadrlardy tartýǵa ketken shyǵyndardy óteý, ınnovatsııalyq grant jáne basqalary. Osyndaı sharalardyń nátıjesinde zamanaýı ekonomıkalyq oıǵa júırik, ónimdiliktiń joǵary deńgeıine ıe, naryqtaǵy kez-kelgen ózgeristerge shapshań beıimdeletin kásiporyndar toby qurylatyn bolady. Qazirdiń ózinde elimizdiń 171 kásiporny soǵan qatysqysy keledi», - deıdi Á. Isekeshev.

Onyń aıtýynsha, 2011 pılottyq jyly baǵdarlama aıasynda 50 jobaǵa 19 mlrd. teńgeniń tetiktik qoldaýyn jasaý kózdelgen.