«Ónimdilik-2020» baǵdarlamasy aıasynda Astana kásiporyndary memlekettik qoldaýǵa ıe boldy
ASTANA. QazAqparat - Astanada «Ónimdilik-2020» baǵdarlamasy aıasynda memlekettik qoldaý sharalaryn alǵan kásiporyndar boıynsha baspasóz týry ótti, dep habarlady Pm.kz.
Tilshilerdiń aralaǵan birinshi kásiporny «KazConstruction Group» JShS - qurylys materıaldaryn (taýar betony jáne penopalıstırol) óndirýshi boldy. Atalǵan kásiporyn «Tehnologııalyq úderisterdi jetildirý» quralyn paıdalanyp, shef-montajdyq jáne iske qosý-jóndeý jumstaryna shyǵyndardy ótedi. Dırektorlardyń orynbasarlary kásiporynnyń tehnologııalyq úderisteri jáne kásiporyndaǵy bolashaqtaǵy josparlanǵan jobalar týraly aıtyp berdi.
Ekinshi kásiporyn - «Astana temirjol sharýashylyǵy» JShS. Kásiporynnyń eki konsoldy kranmen jabdyqtalǵan ashyq alańy bar temirjol tuıyqtary, avtokólikke tıeýge jabdyqtalǵan munara krandary bar asfalttalǵan alańdar bar, sondaı-aq kásiporyn tranzıttik júkter men respýblıka ishilik júkterdi qoımada saqtaý qyzmetterin usynady.
Kásiporyn dırektory Aıman Baıtasqyzy «Qazaqstandyq ındýstrııany damytý ınstıtýty» AQ-nyń shyǵyndy óteý boıynsha jumysynyń jedeldigi (eki jumys kúni ishinde) tań qaldyrǵanyn aıtty. Kásiporyn qyzmetkerlerin oqytýǵa shyǵyndy ótep, «Kásiporynnyń quzirettiligin arttyrý» quralyn paıdalandy.
«TaýKen Altyn» JShS úshinshi kásiporyn boldy. Zaýyt jobasy baǵaly metaldardy affınajdaý salasynda úzdik álemdik balamalarǵa sáıkes jasalǵan. Affınaj zaýytynyń elordada ornalasýyn eskere otyryp, affınajdaý tehnologııasyn tańdaý kezinde irikteýdiń negizgi qaǵıdaty paıdalanylatyn úderisterdiń ekologııalylyǵy boldy. Osyǵan sáıkes baǵaly metaldardy affınajdaýdyń elektrhımııalyq ádisi tehnologııasy tańdaldy, ol tehnologııalyq úderiste paıdalanylatyn jabdyq keshenimen birge ekologııalyq qaýipsizdikti qamtamasyz etedi.
Kásiporyn sondaı-aq, «Ónimdilik-2020» baǵdarlamasy aıasynda qoldaý quraldaryn paıdalandy, ol eńbek ónimdiligin arttyrýǵa áser etti.
