Ónimderdi zańsyz tasymaldaǵandarǵa 22 mln tenge aıyppul salyndy - AShM

NUR-SULTAN. QazAqparat - Jyl basynan beri fıtosanıtarııalyq baqylaý jáne qadaǵalaý júrgizý barysynda karantınge jatqyzylǵan ónimdi el aýmaǵyna ákelý kezinde 600-den astam zań buzýshylyq anyqtaldy, dep habarlaıdy QazAqparat.

«Onyń ishinde: fıtosanıtarlyq sertıfıkattyń bolmaýy - 388, karantındik organızmderdiń anyqtalýy – 13, tańbalaýdyń bolmaýy - 17, fıtosanıtarııalyq sertıfıkattyń sáıkes kelmeýi – 9, karantınge jatqyzylǵan ónimniń kelip túsken jeri boıynsha ekinshi tekserýge usynylmaýy - 60, basqa jol arqyly alyp ótý - 4, fıtosanıtarııalyq talaptardyń buzylýy boıynsha - 45 jaǵdaı, sondaı-aq qol júgine tyıym salý boıynsha 79 zań buzý faktileri anyqtaldy», - delingen AShM baspasóz qyzmetiniń málimetinde.

Kóbine zań talaptaryn buzǵandar Reseıden (439 zań buzýshylyq), Ózbekstannan (110), Irannan (33) júk kirgizgender tarapynan tirkelgen.

Anyqtalǵan jaǵdaılarǵa baılanysty AShM memlekettik ınspektorlary tarapynan zań aıasynda tıisti sharalar qabyldandy. 332 márte jalpy kólemi 10,2 myń tonna karantınge jatqyzylǵan ónim keri qaıtaryldy, zalaldanǵan ónimniń bir partııasy tolyq joıyldy. Jalpy 22,1 mln teńge somasynda aıyppul salynyp, 384 ákimshilik jaza qoldanyldy.

Qazaqstan aýmaǵyna karantınge jatqyzylǵan ónimdi ákelý kezinde anyqtalǵan jaǵdaılar boıynsha eksporttaýshy elderge 105 notıfıkatsııa jiberildi.