Óńeshine tıyn turyp qalǵan 9 jasar tarazdyq bala qutqaryldy
TARAZ. QazAqparat – Tarazdyq dárigerler óńeshinde tıyn turyp qalǵan 9 jasar balany aman alyp qaldy, dep habarlaıdy QazAqparat tilshisi.
Oblystyq Densaýlyq saqtaý basqarmasynyń baspasóz qyzmetinen málim etkendeı, oınap otyrǵan 9 jasar bala baıqamaı tıyn jutyp qoıǵan. Bir saǵattan soń tynys alýy qıyndap, jaǵdaıy nasharlaǵan. Ol oblystyq Kópbeıindi balalar aýrýhanasyna jetkizilgen.
«Ókpe jasýshalaryn túsirgen rentgenografııa qorytyndysy óńeshtiń joǵarǵy jaǵynda bógde zattyń turǵandyǵyn anyqtady. Shuǵyl túrde ony alý úshin búgingi kúni osyndaı jaǵdaıda qoldanylyp júrgen Foleıa (Ispanııa) kateteri (rezeńke tútik) qoldanylady. 2-3 sm úrlenetin 2 qýysty sılıkondy tútikti dene qýysyndaǵy zattardy bosatý, dárilik zattardy engizý, shaıý nemese olardy ótkizý maqsatynda syrtqy ortamen baılanystyratyn rezeńke tútikpen balaǵa jalpy narkoz salynady. Jalpy bul ádis oqystan bolǵan shuǵyl jaǵdaıda tıimdi bolyp sanalady. Sebebi, ýaqyt ótip ketse, denege beıimdelip ketken zatty alý qıynǵa soǵady. Dárigerler joǵaryda atalǵan ádisti qoldana otyryp, ýaqytyly kómek kórsetkenniń arqasynda balanyń jaǵdaıy jaqsaryp, bala medıtsınalyq em-sharadan keıin úıine qaıtaryldy», - delingen habarlamada.
Balanyń ómirine qaýip tóndirgen oqys jaǵdaıda jedel sheshim qabyldaǵan tájirıbeli hırýrgtar Nurtýǵan Álqýatov pen Álimjan Álkenov mundaı oqıǵa jıi bolmasa da, ushyrasyp turatynyn aıtady.
Dárigerler ata-analardan barynsha saq bolyp, balalaryn qaraýsyz qaldyrmaı, olarǵa kóbirek ýaqyt bólýdi jáne usaq zattardy balalardyń qoly jetpeıtin jerge qoıý kerektigin eskertedi.
