Ónerpazdarǵa beriletin memlekettik stıpendııa kólemi 2 ese ósedi — Toqaev
ASTANA. KAZINFORM — E.Rahmadıev atyndaǵy memlekettik akademııalyq fılarmonııaǵa ulttyq mártebe berilýi oryndy. Bul týraly Aqordada mádenıet jáne óner qyzmetkerlerin marapattaý rásiminde Memleket basshysy Qasym-Jomart Toqaev aıtty.
— Men Memleket basshysy retinde ult rýhanııatyna adal qyzmet etip júrgen mamandardyń áleýmettik jaǵdaıyn jaqsartýǵa erekshe mán berip otyrmyn. Máselen, sońǵy 5 jylda olardyń jalaqysy 2 ese ulǵaıdy. Bıyldan bastap ónerpazdarǵa beriletin memlekettik stıpendııa kólemi 2 ese ósedi, — dedi Memleket basshysy.
Prezıdenttiń aıtýynsha, tek byltyrdyń ózinde elimizde 61 mádenıet nysany salyndy. 250-den astam mekemege jóndeý jumystary júrgizildi. Ótken jyly Prezıdent Jarlyǵymen úsh birdeı murajaıǵa ulttyq mártebe berildi. Bul jumys bıyl da jalǵasyn tabady.
— Menińshe, M.Gorkıı atyndaǵy memlekettik akademııalyq orys drama teatryna jáne E.Rahmadıev atyndaǵy memlekettik akademııalyq fılarmonııaǵa ulttyq mártebe berilse oryndy bolar edi. Sondaı-aq S. Muqanov atyndaǵy oblystyq qazaq drama teatryna akademııalyq mártebe berý kerek dep esepteımin. Atalǵan óner ujymdary tutas elimizdiń rýhanı murasyn baıytýǵa ólsheýsiz úles qosyp keledi, — dedi Qasym-Jomart Toqaev.
Buǵan deıin Prezıdent mádenıet jáne óner salasy mamandaryna alǵys bildirgenin jazǵan edik.
