Ónerimiz ben mádenıetimizdi órkendetý úshin áli kóp jumys istelýge tıis - Prezıdent

QYZYLORDA. KAZINFORM – Búkilálemdik muralar komıtetiniń kezekti otyrysynda «Mańǵystaýdyń jerasty meshitterin» uıym tizimine qosý máselesi qaralady. Bul týraly Ulttyq quryltaıdyń V otyrysynda Memleket basshysy Qasym-Jomart Toqaev aıtty.

- Buǵan deıin Ulttyq quryltaıda elimizdiń rýhanı-mádenı murasyn álemge tanytý týraly bastamalar kóterildi. Soǵan sáıkes josparly jumys júrgizilip jatyr. Mysaly 14 jylda alǵash ret asa qundy «Handar shejiresi» qoljazbasyn ıÝNESKO-nyń «Álem jady» derekti muralar tizimine engizdik, - dedi Qasym-Jomart Toqaev.

Prezıdenttiń aıtýynsha, bıyl jazda Koreıa Respýblıkasynyń Pýsan qalasynda Búkilálemdik muralar komıtetiniń kezekti otyrysy ótedi. Sol kezde «Mańǵystaýdyń jerasty meshitterin» uıym tizimine qosý máselesi qaralady.

- Qazir Qazaqstan materıaldyq emes mádenı muralar tizimine óz nysandaryn belsendi túrde engizip jatqan 25 eldiń qataryna kiredi. Biraq munymen toqtap qalýǵa bolmaıdy. Tól tarıhymyzdy zerdeleý, ónerimiz ben mádenıetimizdi órkendetý úshin áli kóp jumys istelýge tıis. Bul sharalar aldaǵy ýaqytta da jalǵasa beredi, - dedi Memleket basshysy.

Osyǵan deıin Prezıdent mamyr aıynda Altyn Orda tarıhyna arnalǵan halyqaralyq sımpozıým bastalatyny týraly aıtty.