Ónerli otbasynyń ónerpaz órenderi - Serikovter otbasy (FOTO)
ALMATY. QazAqparat - Búginde qazaq sahnasynda abyroı-bedeli qalyptasyp qalǵan almatylyq Serikovter otbasy qalyń kópshilikke úlgili otbasy bolyp otyrǵandyǵy aıan.
Qıyndyǵy men qyzyǵy qatar júretin óner jolynda júrse de, bes bala tárbıelep, jetkizip otyrǵan shańyraqtyń bosaǵasy berik, tútini túzý.
Almaty qalasynyń qoǵamdyq ómirine belsendi úles qosyp júrgen otbasy birden ákimshiliktiń nazaryna ilinip, bıyl Serikovter Túrksib aýdanynyń atynan «Mereıli otbasy» baıqaýyna qatysty.
Qalalyq baıqaýda Serikovterdiń shańyraǵy top jaryp, eń úzdik ónerli otbasy atandy.
Otaǵasy belgili akter, «Nysana» teatrynyń dırektory Ábdinasyr Serikov pen otanasy Ǵ.Músirepov atyndaǵy balalar jáne jasóspirimder teatrynyń aktrısasy, «Balapan» arnasyndaǵy «Álippe» baǵdarlamasynyń júrgizýshisi Lıza Serikovanyń shańyraq qurǵanynan bıyl 23 jyl toldy.
Sol ýaqyttan beri jarasymdy jup bes balany tárbıelep jetkizýmen qatar qazaq mádenıetiniń damýyna da úles qosyp keledi.
«Allanyń bergenine myń shúkir. Ómirimiz óner jolymen baılanysta bolsa da, dúnıege kelgen bes balamyzdy kóshten qaldyrmaı ósirip kelemiz. Olardyń barlyǵy kózin ashqaly beri sahnada, sahnanyń syrtynda ósti. Men eshqashan «bala týdym» dep dekrettik demalysta otyryp kórgen emespin. Únemi gastroldik saparǵa shyqqan kezde únemi ózimmen alyp júretinmin. Bizdiń teatr balalarym úshin óz úıindeı bolyp ketti. Olardy barlyq ujym biledi. Teatrdyń jalaqysymen balalardy balabaqshaǵa berýdiń ózi aqylǵa syımaıdy. Balalarymnyń teatr tynysyn sezinip óskeninen bolar, olardyń barlyǵy ónerge jaqyn», - dedi Lıza Zeınelqyzy.
Ónerli juptyń tuńǵyshy Ábilmansur Serikov akterlik joldy tańdaǵan. T.Júrgenov atyndaǵy Óner Akademııasyn támamdaǵan 23 jastaǵy jas akterdiń aýyz tushytyp aıtarlyq tájirıbesi de bar.
QR Prezıdenti týraly «Balalyq shaǵymnyń aspany» fılminde prezıdenttiń mekteptegi bozbalalyq shaǵyn, «Birjan sal» fılminde Láılimniń inisi Mamaıdyń rólin somdaǵan. Qazir ózi de shańyraq kóterip, ata-anasyna tátti nemere súıgizip otyr.
Ekinshi qyzy 17 jastaǵy Hanshaıym mektepti bıyl bitirdi. Aldyna qoıǵan asqaq armandaryna jetýge talpynýda.
Úshinshi qyzy Aıda 9 synypty bitirdi. Mektepte ozat oqýshy, kórkemsóz oqýlary baıqaýlarynyń jeńimpazy da óz ómirin ónermen baılanystyrýdy josparlap otyr.
8 jastaǵy Roza Serikova jastyǵyna qaramastan repertýarynda birshama róli bar qalyptasqan aktrısa desek te bolady.
«Roza «Qaragóz» pesasynda Qaragózdiń balalyq shaǵyn, Іlııas Jansúgirovtyń jary týraly «Fatıma» pesasynda qyzy Ilfany, Shyńǵys Aıtmatovtyń «Qyzyl oramaldy shynarym» pesasynda Áseldiń sińlisin, «Karmensıta» qoıylymynda bıshi qyzdardy oınaıdy. Mekteptegi jıyndarda túrli ertegi personajdaryn somdaıdy. Meniń qyzym da menimen birge gastroldik saparlardan qalmaıdy. «Ata kórgen oq jonar, ana kórgen ton pisher» demekshi, qyzym kishkentaıynan sahnada ósti. Men sahnada bolsam, ol syrtynda uıyqtap jatatyn. Allaǵa shúkir, osy balalarymnyń arqasynda Almatyda Túrksib aýdanynan baspana aldyq», - dedi otanasy Lıza Zeınelqyzy.
Onyń aıtýynsha, sútteı uıyǵan otbasynyń basty qundylyǵy - bereke-birlik pen ózara túsinistikte jatyr.
«Meniń anam eshqashan eriniń aldyn kesip ótpeıtin. Sol kisiden alǵan tárbıem, úlgi-ónegem bolar, men de erimniń aldyna shyǵyp kórgen emespin. Erime degen qurmet - meniń shańyraǵymnyń shaıqalmaýyna kómek berip keledi desem de bolady», - dedi L.Zeınelqyzy.
Sóz sońynda otanasy ózinen keıingi sińlilerine baqytty otbasynyń negizgi tiregi áıel ekendigin aıtyp, otbasynda barynsha keshirimshil, tózimdi bolýǵa keńes berdi.
