Ónerkásiptiń ulttyq aqparattyq tsıfrlyq ekojúıesi qurylady
ASTANA. KAZINFORM — 2026 jyldyń 1 qańtarynda Otandyq taýar óndirýshileriniń tizilimi paıdalanýǵa beriledi. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev aıtty.
— Óńdeý ónerkásibi salasyny tsıfrlandyrý negizgi eki baǵyt boıynsha iske asyrylýda. Birinshisi — óndiristiń tsıfrlyq transformatsııasy. Bul baǵyt óndiriske tikeleı tsıfrlyq sheshimderdi engizýdi qamtıdy. Ótken jyldyń qorytyndysy boıynsha tsıfrlyq tehnologııalardy engizgen kásiporyndardyń úlesi 12,9 paıyzdan 19 paıyzǵa artyp, sany 390-nan 1073-ke deıin ósti. Kıberqaýipsizdik quraldary 246 kásiporynda, Sloud tehnologııalary 142, jasandy ıntellekt sheshimderi 72 kásiporynda engizildi. Al ónerkásiptik robottar 48 óndiriste jumys isteýde, — dedi ol.
Mınıstrdiń málimetinshe, taý-ken metallýrgııa salasynda robottardyń vırtýaldy kóshirmeleri, óndiris alańdarynan jınalǵan úlken derekterdi óńdeý, kompıýterlik kórý tehnologııalary jáne robottanǵan jabdyqtar qoldanylady.
Hımııa ónerkásibinde resýrstardy josparlaý júıeleri, sondaı-aq eńbek qaýipsizdigin qamtamasyz etý quraldary belsendi engizilip jatyr.
Mashına jasaýda vırtýaldy oqytý júıeleri, bólshekterdi 3D-skanerleý jáne jasandy ıntellekt tehnologııalary qoldanylady.
— Sonymen qatar, Memleket basshysynyń tapsyrmasyna sáıkes jasandy ıntellekt tehnologııalaryn engizý Jol kartasy ázirlendi. Osy Jol karta aıasynda «SaryarqaAvtoProm», «Qazfosfat», «Qarmet», «Qaztsınk», ERG sııaqty iri kásiporyndarda 41 joba júzege asyrylýda, — dedi Ersaıyn Naǵyspaev.
Mınıstr tstsıfrlandyrýdyń ekinshi baǵyty memlekettik retteý men qoldaý quraldaryn qamtıtynyn aıtty.
— Ol memlekettik qoldaý sharalaryn avtomattandyrý men júıeleýdi, monıtorıng pen baqylaýdy qamtamasyz etý, sondaı-aq bıznesti qolaıly tsıfrlyq servıstermen qamtamasyz etýdi kózdeıdi. Osy maqsatta Ónerkásiptiń ulttyq aqparattyq tsıfrlyq ekojúıesi qurylady. Júıeniń negizgi komponentteri kezeńmen iske qosylýda, — dedi ol.
Mınıstr qazirde jer qoınaýyn paıdalanýshylardyń satyp alý qyzmetin taldaýǵa múmkindik beretin Tizilim aqparattyq júıesi jumys istep turǵanyn atap ótti.
— Onda 6 myńnan astam tapsyrys berýshi men 900 otandyq ónim óndirýshi tirkelgen. Sonymen qatar, 1 qańtardan bastap memlekettik qoldaý sharalarynyń tıimdiligin arttyrýǵa múmkindik beretin Otandyq taýar óndirýshileriniń tizilimi paıdalanýǵa beriledi, — dedi Ersaıyn Naǵyspaev.
Aıta keteıik, bıyl 10 aıda óńdeý ónerkásibinde 24 trln teńgeniń ónimi shyǵaryldy.