Ónerkásiptik maqsatta sora ósirý talaby bekitiledi
ASTANA. KAZINFORM — Úkimet esirtki jáne psıhotroptyq zattardy óndirýmen nemese daıyndaýmen baılanysty emes ónerkásiptik maqsattarda ósirýge ruqsat etilgen sora (kannabıs) ósimdigin ósirý sharttaryna qoıylatyn talaptardy bekitti.
Qujatqa sáıkes, zańdy tulǵalardyń esirtki jáne psıhotroptyq zattardy óndirýmen nemese daıyndaýmen baılanysty emes ónerkásiptik maqsattarda ósirýine ruqsat etilgen sora (kannabıs) ósimdigindegi tetragıdrokannabınoldyń (TGK) qurǵaq massadaǵy jol beriletin quramy 0,3 paıyzǵa deıingi mólsherde aıqyndady.
Sebýge daıyn sora (kannabıs) tuqymdaryn zertteý egis jumystary bastalǵanǵa deıin júrgiziledi.
Sora (kannabıs) ósimdiginde TGK-nyń bolýyna zertteý júrgizý vegetatsııalyq kezeń ishinde mindetti sanalady jáne myna merzimderde júzege asyrylady:
1) belsendi ósý kezeńinde — sepkennen keıin 40-45 kún ishinde;
2) oryp-jınaý aldyndaǵy kezeńde — sepkennen keıin 90-120 kún ishinde/ónim jınaýdy bastar aldynda.
Sora (kannabıs) tuqymdary men ósimdikterinde TGK-nyń bolýyn zertteýdi sot saraptamasy organy sharttyq negizde sora (kannabıs) ósirýmen aınalysatyn lıtsenzııasy bar zańdy tulǵalardyń qarajaty esebinen júrgizedi.
Zertteý nátıjeleri boıynsha sot saraptamasy organy sora (kannabıs) tuqymdarynda nemese ósimdikterinde TGK-nyń bolýyna qatysty mamannyń qorytyndysyn resimdeıdi.
Zertteý nátıjeleri boıynsha TGK-nyń bolýy belgilengen deńgeıden asyp ketken jaǵdaıda barlyq egis alańy tekserilýge tıis.
Sora (kannabıs) sebýge paıdalanylatyn sorttar «Tuqym sharýashylyǵy týraly» zańǵa sáıkes memlekettik sort synaǵyna berilýge jáne Memlekettik tizilimge engizilýge tıis.
Sebý úshin «Tuqym sharýashylyǵy týraly» zańǵa sáıkes belgilengen standarttarǵa sáıkes keletin biregeı jáne elıtalyq tuqymdar qoldanylady.
Ekinshi jáne odan keıingi reprodýktsııa tuqymdaryn sebýge jol berilmeıdi.
Sora (kannabıs) egistikteri eldi mekenderden, jalpy paıdalanymdaǵy avtomobıl joldarynan jáne basqa da aýyl sharýashylyǵy daqyldarynyń egistikterinen keminde 2 shaqyrym qashyqtyqta qorǵaý aımaǵy qamtamasyz etilip ornalastyrylady jáne ýchaskeniń perımetri boıynsha tor nemese tikenekti symmen qorshalýy, táýlik boıǵy kúzetpen jáne kirip-shyǵatyn bir orynnyń ornatylýymen qamtamasyz etilýi qajet.
Zertteý júrgizý úshin sot saraptamasy organyna zertteý nysandary — sora (kannabıs) tuqymdary men ósirilgen ósimdikteri usynylady. Usynylǵan nysandardyń quramynyń ósimdik tektes zattardyń qasıetterine baılanysty ózgerý múmkindigin (organıkalyq komponentterdiń totyǵýy, quramnyń túrlenýi, shirý ózgeristerine beıimdiligi) joqqa shyǵarý úshin sora (kannabıs) ósimdikterinen iriktelip alynǵan úlgilerdi arnaıy zertteýge dereý usyný kerek.
Qaptama retinde qaǵaz nemese talshyqty materıaldy (qaptar, dorbalar jáne t. b.) paıdalaný qajet, bul obektilerdiń zaqymdanýyn jáne tasymaldaý men saqtaý sharttarynda olardyń ózgerýin bolǵyzbaý úshin jasalady. Qaptamalar nómirlenýge tıis, ótinishte jalpy egis alańy jáne osy nómirlengen obektiler alynǵan jerler kórsetilýi qajet.
Aıta ketelik Túrkistan oblysynda dárilik ósimdik qazǵan sheteldikter ustalǵan edi.