Ónerkásiptik qaýipsizdik salasynda baqylaý kúsheıtildi
ASTANA. KAZINFORM — Qazaqstanda ónerkásiptik qaýipsizdik salasyndaǵy memlekettik retteý kúsheıtildi. Bul týraly QR Tótenshe jaǵdaılar mınıstriniń orynbasary Erbolat Sadyrbaev Ortalyq kommýnıkatsııalar qyzmetinde ótken baspasóz konferentsııasynda habarlady.
Onyń aıtýynsha, 2025 jyly «Azamattyq qorǵaý týraly» Zańyna engizilgen túzetýler ónerkásiptik qaýipsizdikke jańa baqylaý tártibin engizdi. Eń basty jańalyq — endi ónerkásiptik qaýipsizdik QR Kásipkerlik kodeksiniń aıasynan shyǵarylady jáne 2026 jyldan bastap tikeleı «Azamattyq qorǵaý týraly» Zańymen retteledi.
— Jańa tártip táýekelge baǵdarlanǵan tásilge negizdelgen. Joǵary táýekelge jatatyn kásiporyndar men obektiler jyl saıyn tekseriledi. Buǵan qaýipti óndiristik obektiler jáne zaýyt belgilegen normatıvtik qyzmet etý merzimi ótken qaýipti tehnıkalyq qurylǵylardy paıdalanatyn obektiler jatady. Al tómen táýekeldi sýbektiler tek úsh jylda bir ret tekseriledi. Osylaısha, baqylaý tolyq júrgiziledi, biraq obektiniń qaýip deńgeıi eskeriledi, — dedi Erbolat Sadyrbaev.
Sonymen qatar, burynǵydaı tekserý bastalǵanǵa 30 kún buryn habarlaý mindeti alynyp tastaldy. Endi kásipkerlik sýbektisine tek bir jumys kúni buryn habarlanady. Bul baqylaý organdaryna qaýipti óndiristik obektilerdegi jaǵdaıdy naqty baǵalaýǵa múmkindik beredi.
Tekserýler ónerkásiptik qaýipsizdikti qamtamasyz etý boıynsha bekitilgen qaǵıdalarǵa sáıkes júrgiziledi. Josparly tekserýlerdiń nátıjesinde quqyq buzýshylar ákimshilik jaýapkershilikke tartylady. Jańa zań kásiporyndardy qaýipsizdik sharalaryn júıeli túrde ustanýǵa mindetteıdi.
Buǵan deıin sońǵy úsh jylda qaýipti óndiristik nysandarda 67 apat tirkelgeni týraly jazǵan edik.