Ónerkásiptik qaýipsizdik ınspektorlaryna 30-70% ústemeaqy qosylady
ASTANA. KAZINFORM – Qazaqstanda ónerkásip qaýipsizdigi salasyndaǵy kadr tapshylyǵyn azaıtý úshin ınspektorlardyń jalaqysyna 30-dan 70 paıyzǵa deıin ústemeaqy engizildi. Bul týraly Tótenshe jaǵdaılar mınıstri Shyńǵys Árinov Úkimette baıandady.
Mınıstrdiń aıtýynsha, qazir ónerkásiptik qaýipsizdik salasyndaǵy ınspektorlar jetkiliksiz.
– Memleket basshysynyń jáne ózińizdiń qoldaýyńyzben 1 shildeden bastap ónerkásiptik qaýipsizdik ınspektorlaryna 30-dan 70 paıyzǵa deıin ústemeaqy belgilendi. Qabyldanǵan sharalar ónerkásiptik qaýipsizdik salasyndaǵy kadrlyq áleýetti nyǵaıtýǵa múmkindik beredi dep josparlanǵan, – dedi Sh.Árinov.
Sonymen birge, mamandardy daıarlaý sheńberinde byltyr kásiporyn qyzmetkerleriniń kásibı standarttary jańartyldy. Sol arqyly personaldyń biliktiligine qoıylatyn talaptar kúsheıtildi.
Ónerkásiptik qaýipsizdik salasyndaǵy kadrlyq áleýetti daıyndaý sheńberinde elimizdiń tehnıkalyq joǵary oqý oryndarymen «Ónerkásiptik qaýipsizdik» pánin engizý boıynsha memorandýmdar jasaldy.
– Tehnogendik sıpattaǵy tótenshe jaǵdaılardyń aldyn alýǵa jáne óndiristegi qaýipsizdikti qamtamasyz etýge baǵyttalǵan saıasatty iske asyrýdy jalǵastyra beremiz, – dedi TJ mınıstri.
Aıta keteıik, ótken jylmen salystyrǵanda, bıyl kásiporyndarǵa júrgizilgen tekserýler sany 2,5 esege artqan. Nátıjesinde 10 myńnan astam ónerkásiptik qaýipsizdik talaptarynyń buzýshylyǵy anyqtaldy. Ártúrli sanattaǵy 523 qyzmetker ákimshilik jaýapqa tartyldy.
Buǵan deıin mınıstr jumysshylar qaza tapqan «Vostoktsvetmet» pen «Qaztsınktegi» apat boıynsha tergeý júrip jatqanyn aıtqan edi.
