Ónerkásiptik qaýipsizdik: adamı faktordy tómendetý tetikteri qalaı iske asyp jatyr
ASTANA. KAZINFORM — Karerlerdiń qaýipsizdigin monıtorıngileý júıeleri engizilip jatyr. Bul týraly Úkimet otyrysynda QR Ónerkásip jáne qurylys mınıstri Ersaıyn Naǵaspaev málim etti.
- Memleket basshysynyń tapsyrmasyna sáıkes metallýrgııa salasynda jańǵyrtýdy qajet etetin 50 iri kásiporyn aıqyndaldy. Osy kásiporyndardyń jumysyn baqylaý úshin Tehnıkalyq qaıta jaraqtandyrý baqylaý kartasy ázirlendi. Baǵdarlama iske asyrylǵannan bastap kásiporyndar óndiristi jańǵyrtýǵa jáne tehnıkalyq jabdyqtardy jańartýǵa 530 mlrd teńgeden astam ınvestıtsııa saldy. Qazirgi kezde iri metallýrgııa kásiporyndarynda ónerkásiptik qaýipsizdik deńgeıin arttyrýǵa jáne adamı faktordyń áserin tómendetýge baǵyttalǵan zamanaýı tsıfrlyq sheshimder belsendi túrde engizilip jatyr, - dedi E. Naǵaspaev.
Onyń aıtýynsha, táýekelderdi basqarý jáne apattyq oqıǵalardy taldaýǵa arnalǵan biryńǵaı AI-platformasy qurylyp jatyr. Qaýipti aımaqtardy baqylaý jáne qaýipsizdik talaptarynyń saqtalýyn qamtamasyz etý úshin machine vision jáne beıneanalıtıka tehnologııalary qoldanylýda. Sondaı-aq tehnıkany qashyqtan basqarý, karerlerdiń turaqtylyǵyn, órt qaýipsizdigin, jeldetý men gaz ortasyn monıtorıngileý júıeleri engizilip jatyr.
- Qarmet kompanııasynyń shahtalarynda personaldy baqylaý jáne pozıtsııalaý júıeleri, konveıerdegi avtomatty órt sóndirý júıesi jumys isteıdi. Rýdnıkterde óndiris protsesteri tsıfrlandyrylyp, karerlerdiń 3D-modelderin jasaý úshin BPLA apparattary qoldanylýda. Baıytý fabrıkalarynda zamanaýı basqarý júıeleri men robottandyrý elementteri engizilýde. Sondaı-aq qaýipti jaǵdaılardy avtomatty anyqtaý, qaýipsizdik talaptarynyń saqtalýyn baqylaý jáne táýekelderge jedel áreket etý úshin jasandy ıntellekt pen beıneanalıtıka tehnologııalary qoldanylyp jatyr. Bul tsıfrlyq sheshimder óndiristik protsesterdi naqty ýaqyt rejıminde baqylaýǵa, apat pen jaraqattanýdy aldyn alýǵa, adam faktoryn azaıtýǵa jáne táýekelderdi tıimdi basqarýǵa múmkindik beredi, - dedi mınıstr.
Buǵan deıin habarlanǵandaı, Eńbek mınıstri Asqarbek Ertaev 480 myńǵa jýyq adam eńbek jaǵdaılary zııandy jáne qaýipti jumystarda isteıtinin aıtty.
