Ónerkásiptik kásiporyndarǵa avtomattandyrylǵan monıtorıng júıeleri engiziledi
ASTANA. KAZINFORM – Ekologııalyq normatıvterdi buzǵan óndiris oshaqtary jaýapkershilikke tartylady. Bul jóninde Úkimet otyrysynda QR Ekologııa jáne tabıǵı resýrstar mınıstri Erlan Nysanbaev málimdedi.
– Avtomattandyrylǵan monıtorıng júıeleri kásiporyndardy ekologııalyq jańǵyrtýǵa baǵyttalady. Normatıvterdi buzǵan jaǵdaıda kásiporyndar tartylatyn jaýapkershilikti belgileıdi. Atalǵan júıeler qazirdiń ózinde 87 nysanda ornatylǵan (81-i derekterdi onlaın formatta beredi). Olardy barlyǵy 115 nysanǵa engizý josparlanǵan. Sondyqtan jumys belsendi túrde jalǵasady, - dedi ol.
Sondaı-aq óńirlerde qaldyqtardy basqarý salasyndaǵy jobalar jeńildetilgen jolmen qarjylandyrylyp, júzege asyp jatyr.
– Bul baǵyt jalpy somasy 302,6 mlrd teńge bolatyn 64 jobany qamtıdy. Olardyń ishinde 26 jobaǵa 93,8 mlrd teńge qarastyrylyp, qazir iske asyrylyp jatyr, - dedi mınıstr.
Budan bólek ol tabıǵı resýrtardy ulttyq ıgilik retinde paıdalaný máselesine toqtaldy.
– 2035 jylǵa deıin 2 mlrd aǵash egý josparda bar. Qazirdiń ózinde 1 mln 74 myń gektar aýmaqta 1 mlrd 648,4 mln aǵash otyrǵyzyldy. Sonymen qatar jerdiń tozýynyń jáne shóleıttenýdiń aldyn alý úshin birqatar jumys bastalady, - dedi E. Nysanbaev.
Sondaı-aq ekologııalyq mádenıetti arttyrý úshin aýqymdy aǵartýshylyq is-sharalar uıymdastyrylady jáne tsıfrlyq monıtorıng odan ári jetildiriledi.
Buǵan deıin habarlaǵanymyzdaı, Úkimet otyrysynda Premer eki aptada raqymshylyq jasaý tetikteri boıynsha usynys ázirleýdi tapsyrdy.
