Ónerkásiptik kásiporyndardyń 1,3 mlrd teńgege jýyq shyǵyndary óteldi
ASTANA. KAZINFORM – 2025 jyldyń segiz aıynyń qorytyndysy boıynsha memleket kásiporyndardyń 1 mlrd 271 mln 409 myń teńgege shyǵyndaryn ótedi.
«QazIndustry» Qazaqstandyq ındýstrııa jáne eksport ortalyǵynyń Bıznesti yntalandyrý dırektsııasynyń derekterine sáıkes, kásiporyndarǵa eńbek ónimdiligin arttyrýǵa jáne ónimdi ishki naryqqa ilgeriletýge baǵyttalǵan qarjylarynyń bir bóligi óteldi.
– Ótinimderdiń basym bóligi eńbek ónimdiligin arttyrýǵa jumsalǵan shyǵyndaryn óteý boıynsha túsken. Oǵan óndiristegi tehnologııalyq protsesterdi jetildirý, óndiristi jańǵyrtý jáne tsıfrlandyrý, jańa tehnıkalyq jabdyqtar satyp alý, sondaı-aq qyzmetkerlerdi oqytý men olardyń biliktiligin arttyrý jumystary jatady. Osy sharalar boıynsha kásiporyndardyń jalpy somasy 1 mlrd 268 mln 775 myń teńgege 86 ótinimi maquldandy, - delingen Ónerkásip jáne qurylys mınıstrliginiń habarlamasynda.
Birinshi baǵyt boıynsha eń kóp ótinim Astana, Almaty jáne Shymkent qalalaryndaǵy, sondaı-aq Almaty men Pavlodar oblystaryndaǵy óńdeý ónerkásibi kásiporyndarynan tústi. Salalyq bóliniste bul – mashına jasaý, metallýrgııa ónerkásibi, AÓK, jıhaz jáne qurylys materıaldary óndirisi kásiporyndary.
Ekinshi baǵyt boıynsha – ónimdi ishki naryqta ilgeriletýge jumsalǵan shyǵyndardy óteý aıasynda – jalpy somasy 2 mln 633 myń teńge quraıtyn ótinimder maquldandy. Bul baǵytta kásiporyndar ónimniń sáıkestigin rastaýǵa baılanysty shyǵyndarynyń bir bóligin (ónimder men qyzmetterdiń sáıkestigin baǵalaý, sertıfıkattaý jáne zerthanalyq synaqtar, ınspektsııalyq aýdıt pen baqylaý, sertıfıkattardy tirkeý, uzartý jáne qaıta resimdeý) óteı alady. Al jeńil ónerkásip sýbektilerine – aıaq kıim ónimin tańbalaýǵa jumsalǵan shyǵyndardy (sáıkestendirý quraldaryn satyp alý, tańbalaýdy basyp shyǵarý qyzmetterin tóleý, tańbalaý úshin jabdyq pen baǵdarlamalyq jasaqtama satyp alý) óteý qarastyrylǵan.
Esterińizge sala keteıik, QazIndustry kásiporyndardyń tehnologııalyq protsesterdi jetildirýge, óndiristi jańǵyrtýǵa jáne ónimdi ilgeriletýge baılanysty shyǵyndarynyń 40-50 %-yn óteıdi.