Ónerkásipti qoldaýdyń áleýmettik jáne ekonomıkalyq áserin baǵalaý krıterııleri naqtylandy
ASTANA. KAZINFORM — Joǵary aýdıtorlyq palatasynyń nusqamasy boıynsha ónerkásipti memlekettik qoldaý sharalaryn iske asyrýdyń «áleýmettik» jáne «ekonomıkalyq» áseri uǵymdaryn naqtylaý jóninde sharalar qabyldandy. Bul yntalandyrý júıesin ashyq, túsinikti etedi jáne naqty bir nátıjege baǵdarlaıdy.
2024 jyldyń kúzinde ónerkásiptik-ınnovatsııalyq qyzmetti yntalandyrý tıimdiligine memlekettik aýdıt júrgizildi. Tekserý Ónerkásipti damytý qory birinshi kezekte ónerkásiptiń negizgi salalarynda eleýli áleýmettik jáne ekonomıkalyq áser beretin jobalar men lızıngtik mámilelerdi qarjylandyratynyn kórsetti.
Alaıda «QazIndustry» ulttyq damý ınstıtýty» AQ paıdalanatyn Memlekettik qoldaý sharalarynyń tıimdiligin baǵalaý ádistemesinde osy ýaqytqa deıin «áleýmettik» jáne «ekonomıkalyq» áser dep naqty neni kózdeýge bolatyny týraly anyqtama joq. Bul memlekettik qoldaý quraldaryn paıdalaný nátıjelerin obektıvti baǵalaýdy qıyndatady.
Joǵary aýdıtorlyq palata Ónerkásip jáne qurylys mınıstrligine osy kemshilikti túzetýdi tapsyrdy.
Nátıjesinde qoldanystaǵy Ádistemede negizgi uǵymdardyń mazmuny naqtylandy, sondaı-aq kútiletin áserdi esepteýdiń naqty tártibi belgilendi. Atap aıtqanda, endi memlekettik qoldaý nátıjelerin baǵalaý kezinde árbir sharanyń memlekettik baǵdarlamalar men strategııalardyń maqsattaryna qol jetkizýge qosqan naqty úlesi eskeriletin bolady.
Bul ózgerister memlekettiń otandyq ónerkásipti qoldaý júıesiniń ashyqtyǵy men nátıjeliligin arttyrady.
Júrgizilgen memlekettik aýdıttiń qorytyndylary boıynsha berilgen basqa da tapsyrmalar men usynymdardyń oryndalýy Joǵary aýdıtorlyq palatanyń baqylaýynda bolady.
Aıta ketelik Elektr energetıkasy salasyndaǵy memlekettik aýdıtten keıin 16 adam jaýapqa tartylǵan edi.