Ónerkásipti damytý qory bergen 9,5 mlrd teńge boryshtyń tólemi keshiktirilgen

ASTANA. KAZINFORM – «Báıterek» ulttyq basqarý holdıngi Ónerkásipti damytý qory arqyly iri ınvestıtsııalyq jobalarǵa uzaq merzimdi lızıng berip, qurylys-montaj jumystaryna jáne aınalym qarajatyn tolyqtyrýǵa nesıe usynady. 2024 jyly osy maqsatqa berilgen 9,5 mlrd teńgeniń tólemi keshiktirilgen.

Bul týraly «Báıterek» ulttyq basqarý holdınginiń Kazinform saýalyna joldaǵan jaýabynda aıtylǵan.

- Qor men qarjylandyrylatyn taraptar arasynda jasalǵan qarjy lızıngi jáne qaryz sharttarynyń talaptaryna sáıkes bul aqparat kommertsııalyq qupııa jáne qupııa aqparat sanatyna jatady. Mundaı aqparatty úshinshi tulǵalarǵa berý tek ekinshi taraptyń jazbasha kelisimimen nemese Qazaqstan Respýblıkasynyń zańnamasyna sáıkes ýákiletti memlekettik organdardyń resmı suratýy negizinde ǵana múmkin bolady. Sonymen qatar, qordyń lızıngtik jáne nesıelik portfeliniń sapasy qabyldaýǵa bolatyn deńgeıde saqtalyp otyr. Bul - uıymnyń turaqty ári tıimdi jumys isteýiniń mańyzdy faktory. 2024 jyly qor portfelindegi merzimi ótken bereshek (NPL) kórsetkishi nebári 0,5% boldy. Bul aktıvterdi basqarýdyń joǵary sapasy men turaqtylyǵyn bildiredi, - dep jazylǵan málimette.

Qordyń resmı saıtynda qor portfeli 1,9 trln teńge ekeni aıtylǵan.

Eske salsaq, «Báıterek» UBH basqarma tóraǵasy Rýstam Qaraǵoıshın holdıng Qytaıdan 400 mln ıýan qaryz alǵanyn jáne bul basy ǵana ekenin aıtqan edi.