Ónerkásip jáne qurylys mınıstri baspana baǵasyna qatysty pikir bildirdi

 ASTANA. KAZINFORM – Búgin Úkimet otyrysynan keıingi brıfıngte Ónerkásip jáne qurylys mınıstri Qanat Sharlapaev elimizdegi baspana baǵasyna qatysty pikir bildirdi.

- Keshe áriptesim Nurlan Baıbazarov saýaldaryńyzǵa egjeı-tegjeıli jaýap berdi. Memleket áleýmettik turǵyn úı baǵasynyń turaqty bolý úshin sharalar qabyldaıdy. Munda biz «Naýryz», «Otaý» baǵdarlamalary jáne ákimdik naryqtan satyp alatyn jalǵa beriletin úıler týraly aıtyp otyrmyz. Árıne, memleket baǵanyń joǵary shegin óte qatań baqylaýda ustaıdy jáne ótken jylǵa qaraǵandaı ózgeristerdiń oryn alýyn kútpeımiz. Óıtkeni, úlken 2 irgeli sebebi bar. Bizde úı salýǵa jumsalatyn qurylys materıaldarynyń shamamen 70 paıyzy tsement beton, barlyq bazalyq materıal jergilikti ónim. Osyǵan oraı bizde áleýmettik baǵdarlamalar aıasynda baǵanyń joǵary shegin shekteýge múmkindik bar. Memleket bul jumysty júrgizedi, - dedi mınıstr BAQ ókilderiniń saýalyna oraı.

Onyń atap ótýinshe, jeke baspana naryǵynda túrli sanattaǵy páterler bar. Olarda naryqtyq tetikter jumys isteıdi.

Bul naryq, sondyqtan eshteńeni joqqa shyǵarýǵa bolmaıdy. Menińshe, naryqtyń keıbir segmentinde árıne, mundaı ózgerister bolady. Biraq, bul naryqtyq ekonomıka. Ár segmenttegi páterdi satyp alatyn óz satyp alýshysy bolady. Mundaı jaǵdaıda qandaı da bir tikeleı boldam jasaý kúrdeli bolar. Biz memlekettiń mindetti túrde áleýmettik baspana baǵasyn baqylaýǵa baǵyttalǵan jumysyna ǵana súıenemiz, - dedi Qanat Sharlapaev.