Ónerkásip pen turǵyn úıler arasyndaǵy qaýipsizdik aımaqtaryn belgileý jeńildeıdi

ASTANA. KAZINFORM — Ónerkásiptik obektiler úshin sanıtarııalyq-qorǵaý aımaqtaryn belgileýdiń jańa qaǵıdalary bekitildi, dep habarlaıdy Sanıtarııalyq-epıdemıologııalyq baqylaý komıtetiniń baspasóz qyzmeti.

Qazaqstanda ónerkásiptik jáne óndiristik obektilerdiń sanıtarııalyq-qorǵaý aımaqtaryn (SQA) retteýdiń jańa qaǵıdalary qoldanysqa engiziledi. Bul ózgerister 2026 jylǵy 9 qańtarda qol qoıylǵan Qazaqstan Respýblıkasynyń Qurylys kodeksinde kózdelgen.

SQA — bul ónerkásiptik kásiporyndar men turǵyn aımaqtar arasyndaǵy, adamdardy shý, ıis jáne ózge de zııandy áserlerden qorǵaý úshin qajet araqashyqtyq.

— Negizgi ózgeris — SQA-ny belgileý tártibiniń jeńildetilýi. Endi mundaı aımaqtar burynǵydaı eki kezeńde emes, bir kezeńde aıqyndalatyn bolady. Jańa kásiporyndar úshin SQA shekaralary jobany saraptaý kezeńinde belgilenedi. Al qoldanystaǵy obektiler úshin aımaq shekaralaryn ózgertý (ulǵaıtý nemese qysqartý) máseleleri sanıtarııalyq-epıdemıologııalyq qyzmet tarapynan qaralatyn bolady. SQA týraly barlyq derek, onyń ishinde naqty shekaralary, jergilikti atqarýshy organdarǵa berilip, ashyq kadastrlyq kartada kórsetiledi. Bul turǵyn úılerdi, mektepterdi, balabaqshalardy jáne ózge de áleýmettik nysandardy salý kezinde mundaı aımaqtardy aldyn ala eskerýge múmkindik beredi, — delingen komıtet túsiniktemesinde.

Jańa qaǵıdalar qala qurylysy josparlaýyn neǵurlym ashyq etýge jáne turǵyn úılerdiń ónerkásiptik obektilerge jaqyn ornalastyrylý táýekelderin azaıtýǵa yqpal etedi.

Ózgerister 2026 jylǵy 1 shildeden bastap kúshine enedi.

Buǵan deıin Qyzylordada sanıtarııalyq talap saqtamaǵandarǵa 22 mln 800 myń teńgege jýyq aıyppul salynǵany belgili boldy.