Ónerkásip pen qurylysta 75 jańa mamandyq paıda boldy
ASTANA. KAZINFORM – Qazaqstannyń ónerkásip jáne qurylys salalarynda tehnologııalyq ózgeristerge baılanysty 75 jańa mamandyq anyqtaldy. Bul týraly Ónerkásip jáne qurylys mınıstri Ersaıyn Naǵaspaev Úkimet otyrysynda aıtty.
Mınıstrdiń aıtýynsha, eńbek naryǵyndaǵy suranystyń qurylymy da ózgerip keledi. Tsıfrlandyrý, avtomattandyrý jáne robottandyrý jańa daǵdylardy qajet etedi.
– Osyǵan baılanysty mınıstrlikke qatysty salalar boıynsha Jańa mamandyqtar atlasynda 75 jańa mamandyq aıqyndaldy. Onyń ishinde 47 mamandyq – taý-ken metallýrgııada, 11-i – mashına jasaýda jáne 17 mamandyq – qurylys salasynda, – dedi Ónerkásip mınıstri.
Sondaı-aq, jańa tehnologııalyq ózgerister áserinen taǵy 41 mamandyqtyń mazmuny ózgertilip jatyr.
Aıta keteıik, Qazaqstannyń ónerkásip jáne qurylys salalaryna qazirdiń ózinde 36,7 myń kadr qajet. Onyń ishinde 16,2 myń maman qurylys salasyna, taǵy 14,4 myńy óńdeý ónerkásibine kerek.
