Ersaıyn Naǵaspaev mınıstrliktiń qandaı mamandarǵa zárý ekenin aıtty
ASTANA. KAZINFORM – Qazaqstannyń ónerkásip jáne qurylys salalaryna qazirdiń ózinde 36,7 myń kadr qajet. Onyń ishinde 16,2 myń maman qurylys salasyna, taǵy 14,4 myńy óńdeý ónerkásibine kerek. Bul týraly Ónerkásip jáne qurylys mınıstri Ersaıyn Naǵaspaev Úkimette aıtty.
Onyń aıtýynsha, jańa óndiristerdiń iske qosylýy, kásiporyndardyń tehnologııalyq jańarýy jáne qurylys kóleminiń ósýi jumysshy kadrlaryna suranysty arttyryp otyr.
– Búginde mınıstrlikke qatysty salalar boıynsha 36 700 maman qajet. Onyń ishinde eń joǵary qajet etetin mamandyqtar qurylys salasynda – 16 200 adam, óńdeý ónerkásibinde – 14 400 adam, – dedi E. Naǵaspaev.
Jumyspen qamtý jáne bos jumys oryndaryna júrgizgen taldaý boıynsha, kadrlarǵa eń joǵary suranys – qurylys, mashına jasaý jáne taý-ken metallýrgııa salalarynda baıqalǵan.
– Dál osy salalarda bos jumys oryndarynyń sany da kóp. Bul jaǵdaı máseleniń tek jalpy kadr tapshylyǵynda emes ekenin, kórsetip otyr. Negizgi másele – kadrlardyń bilimi men daǵdylarynyń, jumys berýshiler talaptaryna tolyq sáıkes kelmeýi. Sondyqtan bilim berý tapsyrysyn eń aldymen kásiporyndardyń naqty suranysyna qaraı qalyptastyrý qajet, – dedi Ersaıyn Naǵaspaev.
Aıta keteıik, elimizde 138 myń stýdent óndiriste tájirıbe jınaqtap júr. Bul úshin 11,7 myń kásiporyn kolledjdermen jumys isteıdi.
Qazaqstannyń 11 óńirinde jańa zamanaýı kolledjder salynady.
