Qazaqstan alıýmınııi men elektrolız zaýyttary ujymy referendýmda belsendi bolýǵa shaqyrdy
PAVLODAR. KAZINFORM – Jańa Konstıtýtsııa eńbek adamynyń rólin kúsheıtip, qyzmetkerler quqyqtarynyń naqty kepildikterin bekitedi jáne ekonomıkanyń ornyqty damýyna berik negiz qalaıdy. Osyndaı pikirdi Eurasian Resources Group quramyndaǵy Qazaqstan alıýmınııi AQ men Qazaqstan elektrolız zaýyty AQ qyzmetkerleri bildirdi.
Búginde ERG-diń alıýmınıı dıvızıonynda shamamen segiz myńǵa jýyq adam eńbek etedi. Metallýrgterdiń aıtýynsha, Jańa Konstıtýtsııa jobasynda óndiris salasy úshin qoldanbaly mańyzy bar qaǵıdattar kórinis tapqan. Atap aıtqanda, eńbek etý quqyǵy, qaýipsiz eńbek jaǵdaıy jáne áleýmettik qorǵaý máseleleri naqty qamtylǵan.
Eýrazııalyqtardyń paıymynsha, eńbek adamy ekonomıkanyń qosalqy bóligi retinde emes, memlekettiń ornyqty damýynyń negizi retinde qarastyrylady. Mundaı normalardyń konstıtýtsııalyq deńgeıde bekitilýi qyzmetkerlerdiń erteńgi kúnge degen senimin arttyryp, olardyń kásibı úlesiniń mańyzyn aıqyndaı túsedi.
Kásiporyn ujymdary eldiń uzaq merzimdi damý baǵytynyń turaqtylyǵy men aıqyndyǵy ónerkásip úshin sheshýshi mánge ıe ekenin atap ótti. Osyndaı turaqty ortada óndiris damyp, jańǵyrtylyp, jańa jumys oryndary ashylady.
Metallýrgter aldaǵy referendýmǵa azamattardyń qatysýynyń mańyzyn da erekshe atap ótti. Olardyń pikirinshe, ár adamnyń tańdaýy el damýynyń negizgi qaǵıdattaryna tikeleı áser etedi.
– Jańa Konstıtýtsııa eńbek adamynyń múddesi, qaýipsizdik, óndiristi damytý men ekonomıkalyq turaqtylyqty ózara tyǵyz baılanysty birtutas júıe retinde qarastyratyn zamanaýı ári ornyqty modeldi qalyptastyrady. Bul – ómir sapasyna, ınvestıtsııa tartýǵa jáne eldiń uzaq merzimdi básekege qabilettiligine tikeleı yqpal etetin berik negiz, – dedi «Qazaqstan alıýmınııi» AQ Pavlodar alıýmınıı zaýytynyń dırektory Aıtýǵan Ahmetov.
Metallýrgter qazaqstandyqtardy referendýmǵa qatysyp, óz ustanymdaryn bildirýge shaqyrdy. Búgin qabyldanatyn sheshimder eldiń erteńgi bolashaǵyn aıqyndaıdy.