Ónerkásip obektilerinde derbes óndiristik baqylaý qyzmetteri qurylady
ASTANA. KAZINFORM – Jumysshylardyń qaýipsizdigin qamtamasyz etý úshin qaýipti óndiristik obekt ıeleriniń Jańartý jáne tehnıkalyq qaıta jabdyqtaý josparyn jasaý mindeti zańnamalyq deńgeıde bekitiledi. Bul týraly Tótenshe jaǵdaılar mınıstri Shyńǵys Árinov aıtyp berdi.
Onyń aıtýynsha, jumysshylardyń jazataıym oqıǵaǵa tap bolý sebepteriniń biri tozyǵy jetken tehnıkalyq jabdyqtar bolyp otyr.
− Mınıstrlik jumysshylardyń qaýipsizdigin qamtamasyz etý úshin qaýipti óndiristik obekt ıeleriniń Jańartý jáne tehnıkalyq qaıta jabdyqtaý josparyn jasaý mindetin zańnamalyq deńgeıde bekitýdi uıǵardy. Bul shara tehnıkalyq qaıta jabdyqtaý protsesin baqylaý jáne avarııalardyń týyndaý qaýpin azaıtý múmkindigin beredi. Azamattyq qorǵaý salasyndaǵy tıisti zań jobasy Parlament Senatynyń qaraýynda, − dedi Sh.Árinov Úkimet otyrysynda.
Sonymen qatar, apattarǵa júrgizilgen taldaý óndiristik baqylaýdyń jetispeıtinin kórsetken. Qazir bul baqylaýdy qaýipti óndiristik obekt ıeleriniń sheshimimen ártúrli qurylymdardyń jumyskerleri júzege asyrady.
− Kásibı avarııalyq-qutqarý qyzmetterine qoıylatyn jekelegen talaptar olardy menshik quqyǵyndaǵy qutqarý jabdyqtarymen jáne tehnıkamen jabdyqtaý bóliginde qatańdatylady. Men aıtqan zań jobasy aıasynda ónerkásiptik obektilerdegi baqylaýdyń derbes jeke qyzmeti qurylady. Ol jumys isteý úshin mınıstrlik tıisti normalar ázirleıdi. Bul óndiristegi ózindik baqylaýdy kúsheıtip, obekt ıeleriniń jaýapkershiligin arttyrady, − dep atap ótti mınıstr.
Prezıdent tapsyrmasyna sáıkes Ónerkásiptik qaýipsizdik salasyn odan ári damytý jáne arttyrý jospary bekitildi, onyń ishinde zamanaýı qaýipsizdik júıelerin engizý men tsıfrlandyrýdy qamtamasyz etý kózdelgen.
− Atalǵan jumysty byltyr QARMET-pen birlesip bastadyq. Ońtaıly sheshimder men qabyldanǵan sharalardyń arqasynda ken oryndarynda avarııa faktileriniń tirkelmegenin atap ótkim keledi. Qazir Qaraǵandy oblysyndaǵy aýmaqtyq bólimshemizde kómir shahtalaryndaǵy jumysshylardyń ornalasqan jerin anyqtaý jáne izdeý, sondaı-aq gazdaný deńgeıine monıtorıng júrgizý júıeleri engizilýde. Bul tótenshe jaǵdaılarǵa jedel den qoıý men adam óliminiń aldyn alýǵa múmkindik beredi, − dedi Sh.Árinov.
Aıta keteıik, jyl basynan beri Tótenshe jaǵdaılar mınıstrligi 16 myńǵa jýyq obektiniń órt jáne ónerkásiptik qaýipsizdigin tekserip, 100 myńnan astam buzýshylyqty anyqtady.
Sonymen birge, Eńbek jáne halyqty áleýmettik qorǵaý mınıstri Svetlana Jaqypova elimizde ótken jyly eńbek jaǵdaıyndaǵy oqys oqıǵalardan 202 adam qaza bolǵanyn aıtqan edi.