Ónerkásip mınıstrligi taýarlardy tańbalaý arqyly kóleńkeli ekonomıkamen kúrespek
ASTANA. KAZINFORM — Ónerkásip jáne qurylys mınıstrligi taýarlardy tańbalaý júıesin tolyq engizý baǵytynda jumys istep jatyr. Tolyǵyraq atalǵan vedomstvonyń ókili aıtyp berdi.
— Taýarlardy tańbalaý — kóleńkeli ekonomıkaǵa qarsy kúrestegi mańyzdy qural. Sebebi ol taýar qozǵalysyn baqylaýǵa jáne olardyń zańsyz aınalymynyń aldyn alýǵa múmkindik beredi. Bul ádis jetkizý jáne ótkizý tizbeginiń ashyqtyǵyn arttyrýǵa yqpal etip, kontrabandalyq jáne kontrafaktilik ónimderdiń zańsyz saýdasynyń táýekelin tómendetedi, — dedi Ónerkásip jáne qurylys mınıstrligi Ónerkásip komıteti tóraǵasynyń orynbasary Muhamed Andakov elordada ótken jeńil ónerkásip ulttyq birlestiginiń 10 jyldyǵyna arnalǵan ІІ sezinde.
Odan ári mınıstrlik ókili jeńil ónerkásip salasy qyzmetkerlerin kásibı merekesimen quttyqtady.
— Qurmetti áriptester, Ónerkásip komıtetiniń atynan jeńil ónerkásip salasynyń barlyq qyzmetkeri men ardagerdi kásibı merekelerimen quttyqtaımyn! Elimizdiń ekonomıkasyn damytýǵa qosqan úlesterińiz, adal eńbekterińiz ben kásibı sheberlikterińiz úshin shyn júrekten alǵys aıtamyn, — deıdi spıker.
Búgin elordada Qazaqstannyń jeńil ónerkásip ulttyq birlestiginiń 10 jyldyǵyna oraı sezd ótti.
Buǵan deıin habarlaǵanymyzdaı elimizde jeńil ónerkásipti damytýdyń keshendi jospary ázirlenip jatyr.
Aıta keteıik, búginde otandyq jeńil ónerkásip salasynda shamamen 28 myń adam eńbek etedi, olardyń shamamen 60% — áıel mamandar.