Ónerkásip mınıstrligi qalalardyń digital twins modelin jasaý úshin dron qoldanbaq
ASTANA. KAZINFORM — Elimizde machine vision tehnologııasy arqyly qurylys barysy tolyq ári úzdiksiz baqylanady. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev aıtty.
— Qurylys salasynda jasandy ıntellekt jobalaýdan bastap, qurylys barysyn baqylaýǵa deıingi barlyq kezeńde engizilmek. Josparlaý jáne qurylys kezeńinde tsıfrlyq bas josparlar men naqty josparlaý jobalarynyń oryndalýyn baqylaý úshin machine vision tehnologııasy men jasandy ıntellektini biriktirgen pılottyq joba iske qosyldy. Júıe nysandardyń naqty jaǵdaıyn bekitilgen jobalyq qujattamamen salystyrady. Bul jobanyń sáıkestigin anyqtaý ýaqytyn 3 kúnnen 4 saǵatqa qysqartýǵa múmkindik beredi. Sonymen qatar «Qazaqtelekommen» birlesip, qalalardyń digital twins modelin jasaý úshin dron qoldaný jumystary júrgizilýde, — dedi Ersaıyn Naǵaspaev.
Onyń aıtýynsha, jobalaý jáne memlekettik saraptama kezeńinde BIM jobalaryn tekserý úshin jasandy ıntellektti engizý josparlanǵan. Osy maqsatta qurylys normalary mashına oqı alatyn formatqa kóshirilip jatyr. Bul jobalardy aldyn ala tekserýge múmkindik berip, saraptama merzimin qysqartýǵa jaǵdaı jasaıdy.
— Sondaı-aq, bul ár óńirdiń ereksheligi men seısmıkalyq jaǵdaıyn eskere otyryp, tıptik jobalardy qaraý ýaqytyndaǵy aıyrmashylyqty joıady. ıAǵnı elimiz boıynsha memlekettik saraptamanyń biryńǵaı ári ashyq bolýyn qamtamasyz etedi. Qosymsha BIM júıesin jobalaýdyń mindetti standarty retinde engizý josparlanǵan. Birinshi kezeńde ónerkásiptik obektiler qurylysynan bastaımyz. Qurylys kezeńinde nysandardy tsıfrlyq monıtorıngileý qoldanylady. Mysaly, «Qazaqstan turǵyn úı kompanııasynda» machine vision tehnologııasyn qoldanatyn vıdeomonıtorıng júıesi engizilgen. Ol tehnıka qozǵalysyn, jumys kúshin paıdalanýyn jáne qurylys barysyn naqty ýaqyt rejıminde baqylaýǵa múmkindik beredi. Nátıjesinde, qurylysqa tolyq ári úzdiksiz baqylaý qamtamasyz etiledi, — dedi mınıstr.
Aıta keteıik, Úkimet otyrysynda ekonomıka salalaryna jasandy ıntellekt elementterin engizý jaıy talqylanyp jatyr.
