Ónerkásip mınıstrligi ERG-di bólý týraly aqparatqa pikir bildirdi
ASTANA. KAZINFORM — QR Ónerkásip jáne qurylys mınıstrligine Eurasian Resources Group (ERG) kompanııasyn bólý jáne jer qoınaýyn paıdalaný quqyqtaryn berý máselesine qatysty eshqandaı resmı ótinish túspegen. Bul týraly Úkimettegi baspasóz máslıhatynda mınıstr Ersaıyn Naǵaspaev kompanııany ekige bólý týraly tilshi suraǵyna jaýabynda aıtty.
— Biz tek resmı aqparatqa ǵana túsinikteme beremiz. Qazirgi ýaqytta mınıstrlikke aktıvterdi bólý nemese menshik ıelerin ózgertý máselesine qatysty eshqandaı ótinish kelip túsken joq, — dedi mınıstr Úkimet úıinde ótken brıfıngte.
Ersaıyn Naǵaspaevtyń aıtýynsha, qoldanystaǵy zańnamaǵa sáıkes, jer qoınaýyn paıdalanýshy kompanııa qandaı da bir mámile jasar aldynda Ónerkásip mınıstrligine resmı ótinish joldaýǵa mindetti. Mınıstrlik ony qarap, ózge memlekettik organdarmen kelisilgen qorytyndy shyǵarady.
— Baspasózde jazylyp jatqan habarǵa kelsek, aktsıonerler ózara qandaı da bir máseleni talqylap jatqan shyǵar. Biraq resmı túrde eshkim eshqaıda júgingen joq. Mınıstrliktiń ustanymy naqty — bizge eshqandaı qujat túsken joq, — dep atap ótti mınıstr.
Eske salaıyq, maýsym aıynda Bloomberg agenttigi ERG óz bıznesin qazaqstandyq jáne halyqaralyq kompanııa bolyp ekige bólý múmkindigin qarastyryp jatqanyn habarlaǵan.
Basylym málimetinshe, qazaqstandyq aktıvter kásipker Shahmurat Mútáliptiń (39,3%) jáne Qazaqstan Úkimetiniń (40%) baqylaýyna ótýi múmkin. Al Ibragımovter áýletine tıesili qalǵan 20% aktsııa Afrıkadaǵy mys beldeýi, Brazılııa jáne Kongo Demokratııalyq Respýblıkasyndaǵy sheteldik aktıvterdi biriktiretin jeke halyqaralyq kompanııaǵa berilmek.
Eske salsaq, mamyr aıynda Shahmurat Mútálipke tıesili Nature Energy Solutions Ltd. kompanııasy Patoh Shodıevke tıesili 18,6% jáne marqum Aleksandr Mashkevıchtiń muragerlerine tıesili 20,7% aktsııany satyp alyp, ERG-degi úlesin 39,3%-ǵa jetkizgen edi.
