Ónerkásip mınıstrligi 3 jylda 3 joǵary tehnologııalyq kásiporyndy iske qosýy kerek — Bektenov
ASTANA. KAZINFORM — Premer-mınıstr Oljas Bektenov Ónerkásip jáne qurylys mınıstrligine Memleket basshysynyń Joldaýynda aıtylǵan bastamalar boıynsha birqatar naqty tapsyrma júktedi.
— Memleket basshysy básekege qabiletti tereń óńdelgen ónim shyǵarýdy, ásirese sırek jáne jerde sırek kezdesetin metaldar salasynda ónim óndirýdi basym mindet retinde aıqyndap berdi. Ónerkásip mınıstrligi aldaǵy úsh jylda atalǵan baǵyt boıynsha joǵary tehnologııalyq ónim shyǵaratyn keminde úsh kásiporyndy iske qosýdy qamtamasyz etý qajet, — dedi ol Úkimet otyrysynda.
Sondaı-aq Bektenov vedomstvoǵa barlyq geologııalyq aqparatty tsıfrlandyrý jáne júıege keltirýdi tapsyrdy.
— Prezıdent tsıfrlyq quraldardy qoldana otyryp, jer qoınaýynyń zamanaýı kartasyn jasaý úshin aýqymdy aero-geofızıkalyq zertteýler júrgizý qajettigine basa nazar aýdardy. Ónerkásip mınıstrligi atalǵan jumystardy júrgizý úshin jol kartalaryn ázirlep, jasandy ıntellektini engizý esebinen barlyq geologııalyq aqparatty tsıfrlandyrý jáne júıege keltirý boıynsha qajetti sharalar qabyldasyn. Sonymen qatar Ónerkásip mınıstrligi bir jyl ishinde Ulttyq geologııalyq qyzmettiń bazasynda ozyq halyqaralyq standarttarǵa saı keletin sertıfıkattalǵan zerthana qurýy kerek. Budan bólek, osy jyldyń sońyna deıin geologııalyq barlaý jáne jer qoınaýyn ıgerý salasyndaǵy zańnamalyq túzetýlerdiń qabyldanýyn qamtamasyz etken jón, — dedi Úkimet basshysy.
Aıta keteıik, buǵan deıin Premer-mınıstr eldiń ekonomıka blogyna 10 naqty tapsyrma júktegen edi.
Sondaı-aq Tsıfrlyq damý mınıstrligi shuǵyl atqarýy tıis mindetterdi ataǵan edi.