Ónerkásip mınıstri Qarmet-tegi ózgeristerge túsinik berdi

ASTANA. KAZINFORM – Búgin Úkimet otyrysynda QR Ónerkásip jáne qurylys mınıstri Ersaıyn Naǵaspaev metall óńdeý salasyn damytýǵa qatysty jumystardy atady.

- Qara metallýrgııa salasynda Memleket basshysynyń tapsyrmalaryn iske asyrý aıasynda «Qarmet» kombınaty qyzmetin qalpyna keltirýge jáne bolat óndirisin 5 mln tonnaǵa deıin
ulǵaıtýǵa baǵyttalǵan jańǵyrtý baǵdarlamasy iske asyp jatyr. Atalǵan modernızatsııa baǵdarlamasy bolatty tereń óńdeýge jańa serpin bermek. Búginde naryqqa ártúrli bolattyń kóptegen markasy jetkizilip jatyr, - dedi E. Naǵaspaev.

Osy oraıda ol «QazTehna» zaýytynda «Qarmet» kombınatynda óndiriletin 08KP markaly myryshtalǵan bolattan avtobýstar kýzovyna arnalǵan ártúrli metall elementteri jasalatynyn aıtty.

- Modernızatsııa aıasynda bolattyń jańa markalaryn odan ári ıgerý naryqtyń jańa segmentterine shyǵýǵa múmkindik beredi. Mysaly, shtamptaýǵa arnalǵan jáne joǵary berik bolat túrleri avtokomponentter óndirisin lokalızatsııalaýǵa, al atmosfera áserine tózimdi jáne konstrýktsııalyq bolat temirjol vagondary, konteınerler óndirisin keńeıtýge jaǵdaı
jasaıdy, - dedi mınıstr.

Buǵan deıin byltyr elimizde óńdeý ónerkásibidegi ósim men ınvestıtsııalyq belsendilik artqanyn jazǵan edik.