Ónerkásip mınıstri Prezıdentti vedomstvonyń aldaǵy josparlarymen tanystyrdy

ASTANA. KAZINFORM – Qasym-Jomart Toqaev Ónerkásip jáne qurylys mınıstri Ersaıyn Naǵaspaevty qabyldady, dep habarlaıdy Aqordanyń baspasóz qyzmeti.

Memleket basshysyna mınıstrliktiń byltyrǵy atqarǵan qyzmetiniń qorytyndysy men aldaǵy kezeńge arnalǵan jospary baıandaldy.

Ersaıyn Naǵaspaevtyń aıtýynsha, ótken jyly ónerkásip salasynda negizgi kapıtalǵa salynǵan ınvestıtsııalar men óńdelgen ónimder eksporty eń joǵary ósim kórsetti. Bıyl osy úrdisti saqtap, óndiris kólemin arttyrý josparlanyp otyr.

Prezıdentke geologııa, halyqty aýyzsýmen qamtamasyz etý jáne tsıfrlandyrý baǵyttaryndaǵy jumystar jóninde málimet berildi. Atap aıtqanda, Jer qoınaýyn paıdalanýdyń biryńǵaı platformasy iske qosyldy. Qala qurylysy jobalary tsıfrly júıege kóshirildi. Aýyldarda biryńǵaı kommýnaldyq tólem jobasyn engizý josparlanyp otyr. Jasandy ıntellekt kómegimen geologııalyq bilim qoryn jasaqtaý qolǵa alyndy.

Kezdesý sońynda Prezıdent mınıstrge ortasha jáne tereń óńdelgen ónim kólemin ulǵaıtý, bıyl otandyq taýar óndirýshilerdiń biryńǵaı reestrin jasaqtaý, ınvestor tartý jumystaryn jandandyrý jóninde birqatar tapsyrma berdi.

Memleket basshysy josparlanǵan turǵyn úılerdi paıdalanýǵa berý, halyqty aýyzsýmen barynsha qamtamasyz etý, qurylys jáne turǵyn úı-kommýnaldyq sharýashylyǵy salalaryndaǵy úderisterdi tsıfrlandyrý jumystaryn belsendi júrgizý mańyzdy ekenin atap ótti.

Budan bólek, vedomstvo basshysyna óńdeý ónerkásibi nysandaryn ýaqtyly iske qosý tapsyryldy. Sondaı-aq jer qoınaýyn paıdalaný salasyndaǵy reformalardy merziminde ári sapaly aıaqtaý mindeti júkteldi.

Qasym-Jomart Toqaev otandyq taýar óndirýshilerdi qoldaý sharalarynyń tıimdiligin arttyrýdy qatań baqylaýǵa alý qajettigin aıryqsha atap ótti.

Osyǵan deıin bes jylda jeńil ónerkásip salasynda 3 myń jumys orny qurylǵany týraly jazdyq.