Ónerkásip mınıstri qurylys kodeksiniń jobasyna qatysty aıtylǵan synǵa jaýap berdi

ASTANA. KAZINFORM – Ónerkásip jáne qurylys mınıstri Qanat Sharlapaev jańa qurylys kodeksiniń jobasyna qatysty depýtattardyń aıtqan synyna jaýap berdi.

«Kodeks birinshi kezekte Qazaqstan azamattarynyń quqyqtaryn qorǵaýǵa baǵyttalǵan dep esepteımin. Sapasyz qurylys jáne osy saladaǵy basqa da kemshilikterdi jaqsy bilesizder. Sondyqtan qurylysqa memlekettik baqylaýdy kúsheıtetin qujat jobasyn ázirledik», - dedi Q. Sharlapaev Parlament Májilisinde tilshiler suraǵyna jaýap bere otyryp.

Onyń aıtýynsha, kodeks jobasy sapasyz qurylysqa kóńili tolmaıtyn qazaqstandyqtardyń quqyǵyn qorǵap, qurylys kompanııalarynyń jumys isteý jaǵdaıyna birshama baqylaýdy kúsheıtetindeı etip jazylǵanyn atap ótti.

Aıta keteıik, bıyl aqpan aıynda Májiliste jańa Qurylys kodeksiniń jobasyn tanystyrýǵa arnalǵan jıynda depýtat Baqytjan Bazarbek atalǵan qujattaǵy normalardy synǵa aldy.