Ónerkásip mekemeleri 2027 jyldyń 10 maýsymyna deıin sý paıdalaný josparyn usynýǵa mindetti
ASTANA. KAZINFORM – Óndiris jáne ónerkásip mekemeleri 2027 jyldyń 10 maýsymyna deıin sýdy qaıta jáne aınalmaly paıdalaný júıelerine kóshý josparyn usynýy kerek. Bul týraly Sý resýrstary jáne ırrıgatsııa mınıstrligi habarlady.
Jańa Sý kodeksine sáıkes, ónerkásiptik jáne jylý energetıkasy salasyndaǵy kásiporyndar 2027 jyldyń 10 maýsymyna deıin sýdy qaıta jáne (nemese) aınalmaly paıdalaný júıelerine kóshý josparyn ázirleýge mindetti. Bul – arnaıy sý paıdalaný ruqsatyn alý úshin qajet talaptardyń biri.
Jospar bekitilgen kúnnen bastap bes jyldan keshiktirilmeı naqty iske asyrylýy tıis. Bul talaptan tek sýdy qaıta jáne aınalmaly paıdalaný júıesimen jumys isteıtin jáne sýdyń maqsatsyz ysyrabyn barynsha qysqartqan mekemeler ǵana bosatylady. Eger sý paıdalanýshy kásiporyn ónerkásiptik tutynýshylarǵa sý jetkizý qyzmetin kórsetse, jasalatyn kelisimsharttarda sý tutyný men sý burýdyń menshikti normalaryn ázirleý jáne usyný sharttary mindetti túrde qamtylýy tıis.
Bul normalar bes jyl merzimge eseptelip, sýdyń artyq shyǵynyn azaıtý men arnaıy sý paıdalaný ruqsatyn alýdy jeńildetýge baǵyttalady. Sýdy qaıta jáne aınalmaly paıdalaný júıesine kóshý josparlaryn ázirlemegen nemese júzege asyrmaǵan jaǵdaıda, Sý resýrstary jáne ırrıgatsııa mınıstrliginiń basseın ınspektsııalary arnaıy sý paıdalaný ruqsatyn berýden nemese uzartýdan bas tartýǵa quqyly.
– Mundaı josparlardyń bolýy kásiporyndardyń sý únemdeý tehnologııalaryn engizýge jáne eldiń sý resýrstaryna túsetin júktemeni azaıtýǵa daıyn ekendigin kórsetedi. Sý kodeksindegi jańa normalar burynǵydaı tek formaldy talap emes, naqty mindet pen zańdy kúshke ıe quralǵa aınaldy. Tarıhta alǵash ret sý únemdeý tehnologııalaryn engizýge jáne sý qoryn sarqylýdan qorǵaýǵa baǵyttalǵan quqyqtyq yntalandyrýlar men sanktsııalar júıesi quryldy. Bul memleketimizdiń sý saıasatynyń strategııalyq maqsattaryna tolyq sáıkes keledi, – dedi Sý resýrstary jáne ırrıgatsııa mınıstriniń birinshi orynbasary Nurlan Aldamjarov.
Aıta keteıik, Qazaqstanda Sý resýrstary jáne ırrıgatsııa mınıstrligi ázirlegen jańa Sý kodeksi kúshine endi.