Ónerkásip komıtetine baǵynysty kásiporynda 14,2 mln teńge jalaqy men syıaqy zańsyz tólengen – aýdıt
ASTANA. KAZINFORM – 2024 jyly naqty jumys istelmegen ýaqyt úshin eńbekaqy tóleýge baılanysty 14,2 mln teńge kóleminde óreskel qarjylyq zań buzý anyqtaldy. Bul týraly Qarjy mınıstrliginiń Іshki memlekettik aýdıt komıtetiniń baspasóz qyzmeti habarlady.
2025 jyly azamattyq ustanymy belsendi azamattyń ótinishiniń arqasynda Almaty qalasy boıynsha Іshki memlekettik aýdıt departamenti «Qazaqstan Respýblıkasy mıneraldyq shıkizatyn keshendi qaıta óńdeý jónindegi ulttyq ortalyq» sharýashylyq júrgizý quqyǵyndaǵy RMK-na tekserý júrgizdi. Bul mekeme Indýstrııa jáne qurylys mınıstrliginiń Ónerkásip komıtetiniń vedomstvolyq baǵynysty uıym.
— Aýdıt naqty qyzmetkerlerge jalaqy men syıaqy esepteýdiń negizdiligi máselelerine baǵyttaldy. Nátıjeleri asa alańdatarlyq boldy: 2024 jyly naqty jumys istelmegen ýaqyt úshin eńbekaqy tóleýge baılanysty 14,2 mln teńge kóleminde óreskel qarjylyq zań buzý anyqtaldy.
Tekserilgen bıýdjettik qarajat pen aktıvterdiń jalpy kólemi 188,9 mln teńge. Eńbekaqy tóleýdegi zań buzýdan bólek, aýdıtorlar 34,4 mln teńge somasynda birqatar eleýli rásimdik aýytqýdy tirkedi. Olardyń qatarynda — úsh qashyqtan jumys isteıtin qyzmetkermen eńbek sharttarynyń bolmaýy (3,7 mln teńge), úsh qyzmetkerde jumys ýaqytynyń shekti normasynan asyp ketýi (12,7 mln teńge), sondaı-aq ǵylymı-tehnıkalyq baǵdarlama boıynsha konkýrstyq qujattamany ázirleý qyzmetterine negizsiz shyǵyn (18 mln teńge) bar, — delingen Іshki memlekettik aýdıt komıteti habarlamasynda.
Tekserý nátıjesi boıynsha anyqtalǵan zańbuzýdy joıý jáne kináli laýazymdy tulǵalardy jaýapkershilikke tartý máselesin qaraý týraly nusqama berildi. Oryndaý erekshe baqylaýǵa alynǵan, al jınaqtalǵan materıaldar qylmystyq qýdalaý jónindegi ýákiletti organdarǵa berildi.
— Mundaı tekserýler basqarýdaǵy osal tustardy ǵana kórsetip qoımaı, qoǵamnyń memlekettik ınstıtýttarǵa degen seniminiń negizi ashyqtyq pen zań talaptaryn saqtaý ekenin eske salady, — dep sarapshylar atap ótedi.
Aıta ketelik BQO-da sheneýnik tártiptik jazasy bola tura, ózine 800 myń teńgedeı syıaqy taǵaıyndaǵany týraly jazǵan edik.