Ónerkásip qaýipsizdigi: TJM birinshi jartyjyldyqta 424 tekserý júrgizýdi josparlap otyr
ASTANA. KAZINFORM – Bul týraly QR Tótenshe jaǵdaılar mınıstri general-maıor Shyńǵys Árinov aıtty, dep habarlaıdy mınıstrliktińi baspasóz qyzmeti.
Mınıstr Memleket basshysynyń qaýipti óndiristerde jumys isteıtin azamattardyń qaýipsizdigin qamtamasyz etý máseleleri boıynsha tapsyrmalaryn iske asyrýǵa arnalǵan jumys keńesinde sóılegen sózinde 2024 jyly Tótenshe jaǵdaılar mınıstrligi ónerkásiptik qaýipsizdigi salasynda 1 myńnan astam tekserý júrgizgenin, 27 myńnan astam buzýshylyq anyqtalǵanyn, 160 adam ákimshilik jaýapkershilikke tartylǵanyn atap ótti.
Al bıylǵy birinshi jartyjyldyqta 424 tekserý júrgizbek.
Baqylaýdaǵy obektilerdiń jalpy sany 217 myńnan astam tehnıkalyq qurylǵylardy qosa alǵanda, 10 myńnan asady. Sońǵy úsh jylda olardyń sany 20%-ǵa ósti, al ınspektorlar sany ózgerissiz qaldy — búkil el boıynsha 381 quraıdy.
2024 jyly jaraqat alǵandar sanyn 7 esege jáne qaza tapqandar sanyn 6 esege azaıtýǵa múmkindik týdy. Qaýipti óndiristik nysandarda barlyǵy 21 avarııa tirkeldi, bul ótken jyldyń deńgeıine sáıkes keledi. Oqıǵalardyń eń kóp sany munaı-gaz jáne taý-ken salalaryna tıesili.
«Ótken jyly ónerkásip qaýipsizdiginiń 2030 jylǵa deıingi tujyrymdamasy bekitildi. Ony iske asyrý sheńberinde obektilerdi tsıfrlandyrýdy eskere otyryp, barlyq normatıvtik-quqyqtyq aktilerdi qaıta qaraý, ónerkásiptik qaýipsizdikti qamtamasyz etýge qoıylatyn talaptardy kúsheıtý, ǵylymdy damytý jáne tıisti ortalyqtar qurý, sondaı-aq memlekettik ınspektorlardyń kadrlyq áleýeti men quqyqtyq mártebesin arttyrý josparlanýda», - dedi mınıstr.
Qazirgi ýaqytta ónerkásiptik qaýipsizdik boıynsha jekelegen talaptar qaıta qaralýda. Azamattyq qorǵaý jónindegi zań jobasy sheńberinde avarııalyq-qutqarý qyzmetterine qoıylatyn talaptar qatańdatylýda, óndiristik baqylaý jónindegi talaptar kúsheıtilýde, sondaı-aq qaýipti óndiristik obektiler ıeleriniń jabdyqtardy jańartý jáne jańǵyrtý jónindegi jańa mindetteri kózdelgen. Budan basqa, ónerkásiptik qaýipsizdik obektileriniń pasporttaryn qurýǵa, avarııalardy esepke alýdy jáne basqa da protsesterdi avtomattandyrýǵa múmkindik beretin «E-KPB» aqparattyq júıesin iske qosý josparlanýda.
Memleket basshysynyń tapsyrmasy boıynsha aýmaqtyq bólimsheler men vedomstvolyq baǵynysty mekemelerdi biryńǵaı bólimshe Tótenshe jaǵdaılar departamentine ortalyqtandyrý aıaqtaldy. Bul artyq basqarý býyndary men sybaılas jemqorlyq táýekelderin boldyrmaı, tótenshe jaǵdaılardan halyqtyń jáne el aýmaǵynyń qaýipsizdigin qorǵaý jáne qamtamasyz etý boıynsha memlekettik basqarý men baqylaýdyń naqty vertıkalyn qurýǵa múmkindik berdi.
- Jalpy Tótenshe jaǵdaılar mınıstrligi jumys tıimdiligin arttyrýǵa jáne azamattar úshin táýekelderdi azaıtýǵa baǵyttalǵan ónerkásiptik qaýipsizdikti qamtamasyz etýdi jaqsartý boıynsha sharalar qabyldaýda, - delingen habarlamada.
Premer-mınıstr Oljas Bektenov Memleket basshysynyń qaýipti óndiriske tartylǵan azamattardyń qaýipsizdigin qamtamasyz etý jónindegi tapsyrmalaryn júzege asyrý máseleleri boıynsha jumys keńesin ótkizgenin habarladyq.