Ónerkásiptik saıasatty túbegeıli qaıta qaraý qajet - Darıǵa Nazarbaeva
NUR-SULTAN. QazAqparat - Senat Tóraǵasy Darıǵa Nazarbaeva elimizdiń ózin-ózi qamtamasyz etý jaǵdaıyna, ásirese koronavırýs indetiniń pandemııasy kezindegi máselelerge alańdaýshylyq bildirip otyr. Senat Tóraǵasy ol týraly «Egemen Qazaqstan» gazetinde jarııalanǵan maqalasynda atap kórsetti, dep habarlaıdy QazAqparat Senattyń baspasóz qyzmetine silteme jasap.
Joǵarǵy Palatada naýryz aıynyń basynda «Qazaqstannyń jeńil ónerkásibi: qazirgi jaı-kúıi jáne ónimdiligi joǵary bıznestiń damý bolashaǵy» atty parlamenttik tyńdaý ótken bolatyn.
Darıǵa Nazarbaeva depýtattar sala ókilderimen birlese otyryp, negizgi problemalyq máselelerdi anyqtaýda aýqymdy jumystar atqarǵanyn jáne Qazaqstannyń jeńil ónerkásibin damytý jóninde birqatar usynystar ázirlegenin atap ótti. Degenmen, barlyq elderge demde taraǵan qaýipti dert el ekonomıkasyndaǵy salalardyń rólin qaıta qaraýǵa májbúr etedi. «Koronavırýs pandemııasynyń saldary álemdik jáne otandyq ekonomıkaǵa da aýyr tııýi múmkin. Bul jaqsy emes. Salalardaǵy úırenshikti baılanystar buzyldy», - dedi Palata basshysy.
Senat Tóraǵasy daǵdarys jaǵdaıynda el qaýipsizdigine qatysty negizgi máselelerdi kótere otyryp, ekonomıkanyń barlyq sektorlarynda jumyldyrý rezervteriniń bolýy qajettigin atap ótti. «Naryqqa bárin bere salýǵa bolmaıdy. Ónerkásiptik saıasatty túbegeıli qaıta qaraý qajet. Kútpegen jaǵdaılarǵa jaýap berý úshin jumyldyrý qýaty men memlekettik rezervti qalpyna keltirý – ómirlik mańyzy bar máseleler», - dedi ol. Darıǵa Nazarbaeva sonymen qatar, aımaqtar da óz erekshelikterine qaraı shuǵyl jaǵdaılarǵa jaýap qaıtarýdyń arnaıy tetikterin qarastyrýy tıis ekenine erekshe nazar aýdardy.
Senat basshysy el ekonomıkasyndaǵy daǵdarysty jaǵdaılar týraly aıta kelip: «Bizdiń ekonomıkamyz ıkemdi bolmaı shyqty. Sońǵy ýaqytta pandemııa men munaıǵa baılanysty energııa qoryna suranystyń tómendeýi Qazaqstan ekonomıkasy úshin buryn-sońdy bolmaǵan syn-qaterler týdyrdy. Endi barlyq ınstıtýttyń beriktigi synalady», dedi.
D.Nazarbaevanyń aıtýynsha, bar resýrstardy múmkindiginshe óńdeý ónerkásibin damytýǵa jumsaý kerek, bul álbette jeńil ónerkásipke qatystybolyp otyr. «Bárinen buryn eldiń azyq-túlik qaýipsizdigin qamtamasyz etetin aýyl sharýashylyǵyna qatysty. Qıyn kezeń keldi. Biz kóp nárseden bas tarta alamyz. Biraq tamaq, kıim, aıaq kıim árqashan jetkilikti bolýy tıis», - dedi Palata Tóraǵasy.
D.Nazarbaeva sonymen qatar elimizdiń ekonomıkasyndaǵy agroónerkásip sektorynyń róline erekshe toqtala kelip: «Agroónerkásip kesheni elimizdiń azyq-túlik táýelsizdigin qamtamasyz etetin jáne halyqtyń kúndelikti tutyný taýarlaryna degen negizgi qajettilikterin qanaǵattandyratyn ekonomıka salalary úshin táýelsiz shıkizat kózi bolýy tıis», - dedi.
Senat Tóraǵasy maqalany qorytyndylaı kelip, strategııalyq sıpattaǵy qujattardy qaıta qaraý qajettigin atap kórsetti. «Barlyq damý baǵdarlamasyna oryn alýy múmkin daǵdarystarǵa baılanysty túzetýler engizýge tıispiz. Bul – pandemııa, klımattyń ózgerýi, dushpandyq áreketter, shıkizat nemese qarjy naryqtaryndaǵy qurylymdyq quldyraýlar jáne elimiz úshin qalamaıtyn basqa da jaǵdaılar bolýy múmkin. Alaıda biz barlyǵyna daıyn bolýymyz kerek», - dedi D.Nazarbaeva.
Maqalanyń tolyq nusqasyn myna siltemeden oqı alasyzdar.
