Ónerkásiptik saıasat jónindegi vedomstvoaralyq komıssııa qurylady – zań jobasy
«Memleket basshysy óz Joldaýynda óńdeý sektorynyń mańyzdy problemasy shıkizatqa qol jetkizý máselesin zań júzinde sheshýdi basa tapsyrdy. Biz óńdeýshi ónerkásip kásiporyndaryn shıkizatpen qamtamasyz etý mehanızmin pysyqtap, barlyq múddeli taraptarmen kelisý boıynsha jumys atqardyq. Zań jobasy aıasynda óńdeýshi ónerkásip kásiporyndaryn shıkizatpen qamtamasyz etý qaǵıdalaryn bekitý boıynsha ýákiletti organǵa tıisti quzyret anyqtalyp otyr (Indýstrııa jáne ınfraqurylymdyq damý mınıstrligi)», - dedi B. Atamqulov.
Onyń aıtýynsha, tıimdi ónerkásiptik saıasat - ónerkásiptik, saýda, ınvestıtsııalyq, ınnovatsııalyq jáne basqa komponentterdiń ózara baılanysy. Mundaı jaǵdaılarda teńdestirilgen jáne keshendi ónerkásiptik saıasattyń iske asyrylýyn qamtamasyz etý mańyzdy. Bul úshin zań jobasynda Ónerkásiptik saıasat jónindegi vedomstvoaralyq komıssııany qurý kózdelgen.
«Vedomstvoaralyq komıssııa problemalardy ashyq túrde talqylaý jáne ózara qolaıly sheshimderdi tabý úshin alań bolady.
Zań jobasynda ishki jáne syrtqy naryqtarda ilgeriletý boıynsha qadamdar kózdelgen», - dedi mınıstr.
Budan buryn habarlanǵandaı, Parlament Májilisiniń jalpy otyrysynda «Ónerkásiptik saıasat týraly» zań jobasy birinshi oqylymda qaraldy.
Belgili bolǵandaı, ónerkásiptik saıasat aıasynda bıznes úshin yntalandyrýdyń 20-ǵa jýyq is-sharalary qoljetimdi bolady.
Zań jobasynda sondaı-aq Ónerkásipti damytý qorynyń jumys isteý máseleleri rettelgen. Qor jabdyqtardy satyp alýǵa lızıngtik qarjylandyrý, sondaı-aq 3 paıyzdan aspaıtyn mólsherleme boıynsha ónerkásiptik-ınnovatsııalyq jobalarǵa jeńildikpen kredıt berý sııaqty yntalandyrý is-sharalarynyń operatory bolady.
