Ónerkásiptik revolıýtsııaǵa Qazaqstanmen birge daıyndalamyz - Koreıa Prezıdenti
«Osy negizde bolashaqqa baǵyttalǵan ekonomıkalyq yntymaqtastyqtyń joldaryn usynǵym keledi. Birinshiden, ekijaqty qarym-qatynastyń keńistigin túrli salalar boıynsha keńeıtý kerek. Yntymaqtastyǵymyz kóbine energetıkalyq resýrstar, ınfraqurylym salasynda damyp keldi. Aldaǵy kezeńde ózara baılanystarda densaýlyq saqtaý, qarjy, mádenıet, týrızm salalaryna erekshe ekpin qoımaqpyz», - dedi Ońtústik Koreıa basshysy Qazaqstan-Koreıa bıznes-forýmynda.
Osy oraıda ol búgin eki el arasynda mańyzdy qujattarǵa qol qoıylǵanyn eske saldy.
«Qazaqstan men Ońtústik Koreıa Tórtinshi ónerkásiptik revolıýtsııa jaǵdaıynda damýǵa birge daıyndalady. Osy arqyly aldyńǵy qatarlyq tehnologııalar salasynda yntymaqtastyqty birlese ilgeriletýge kelistik», - dedi Mýn Chje In.
Sonymen qatar ol eki el logıstıka salasynda da yntymaqtastyqty nyǵaıtýǵa múddeli ekenin jetkizdi.
Aıta keteıik, búgingi bıznes-forýmda QR Prezıdenti Qasym-Jomart Toqaev Qazaqstanda iskerlik bastamalar men ınvestıtsııalardy júzege asyrý úshin qolaıly jaǵdaılar jasalǵanyn atap ótti.
Budan buryn habarlanǵandaı, Koreılik ınvestorlar Qazaqstandaǵy birqatar jobaǵa qyzyǵýshylyq tanytty. Taraptar Qazaqstandaǵy memlekettik-jekeshelik áriptestik (MJÁ) jobalaryn júzege asyrý salasynda yntymaqtasýǵa jáne osy jobalarǵa koreı ınvestorlaryn tartýǵa járdemdesýdi kózdep otyr.
